SQO-da eki mektep tolyq, 52 mektep ishinara onlaın oqytýǵa kóshti

PETROPAVL. KAZINFORM – Soltústik Qazaqstan oblysynda JRVI-men aýyrǵandar sanynyń artýyna baılanysty 292 synyptyń 2900-ge jýyq oqýshysy qashyqtan oqýǵa kóshirildi.

SQO bilim basqarmasy bilim berý uıymdarynda monıtorıng júrgizdi. Qazirgi ýaqytta 54 mektepte 1896 oqýshy JRVI-men aýyryp jatyr. Oqý protsesi úzilmeı, oqýshylar tsıfrlyq bilim berý platformalary arqyly sabaq oqyp jatyr.

Óńirde eki mektep – Aıyrtaý aýdanyndaǵy Arykbalyq orta mektebi jáne Shal aqyn aýdanyndaǵy Aqan-Baraq orta mektebi tolyq qashyqtan oqytý formatyn engizdi.

Petropavldaǵy 20 mektepte jeke synyptar onlaın oqytýǵa kóshti.

M.Jumabaev aýdanynda bes mektep, Shal aqyn aýdanynda 10 mektep, Taıynsha, Tımırıazev aýdandarynda eki mektepten, Qyzyljar aýdanynda jeti mektep jáne Ýálıhanov aýdanynda mektep-ınternattyń synyptary qashyqtan bilim alyp jatyr.

Petropavldaǵy oblystyq mektepterdiń beseýinde de synyptaǵy oqýshylardyń 30% astamy aýyrǵandyqtan, balalar onlaın formatqa kóshirildi.

Mamandardyń aıtýynsha, vırýstyń taralýyn tejeý maqsatynda bilim berý uıymdarynda qazir kabınet júıesin saqtaý, sanıtarlyq tazalaý, jeldetý, sondaı-aq medıtsınalyq qyzmetkerler arqyly oqýshylardy júıeli medıtsınalyq baqylaý sııaqty keshendi aldyn alý sharalary júrgizilip jatyr.

Buǵan deıin astanalyq dárigerdiń JRVI-ǵa baılanysty ata-analarǵa úndeýin jarııalaǵan edik.