SQO-da eki gıdrotehnıkalyq qurylys apatty jaǵdaıda tur

PETROPAVL. KAZINFORM — Soltústik Qazaqstan oblysy aýmaǵynda 18 gıdrotehnıkalyq qurylys tirkelgen. Olar sý resýrstaryn retteý, tasqyn sýdyń aldyn alý jáne eldi mekenderdiń qaýipsizdigin qamtamasyz etý maqsatynda strategııalyq mańyzǵa ıe.

SQO ákimdiginiń málimetinshe, 18 gıdrotehnıkalyq qurylystyń beseýi — respýblıkalyq menshikte, 12 nysan kommýnaldyq menshikte jáne 1 nysan jeke menshikke berilgen.

Qazirgi ýaqytta 2 gıdrotehnıkalyq qurylys apatty jaǵdaıda dep tanylǵan. Sonyń bireýi — Ǵ. Músirepov atyndaǵy aýdan aýmaǵyndaǵy sý qoımasy bar Sharyq gıdrotoraby. Bul nysan «Qazsýshar» kásipornynyń qaraýynda.

Nysan quramynda jobalyq kólemi 8 mln 257 myń tekshe metr bolatyn Sharyq sý qoımasy bar.

2016 jyly jerden salynǵan bógettiń qabyrǵasynda ótkizý qabileti 408 m³/sek bolatyn jaryq paıda bolǵan. Osy aqaýdyń saldarynan gıdrotorap apatty jaǵdaıǵa aýystyryldy.

Tómende ornalasqan eldi mekenderge — Mádenıet, Kókalajar, Rýzaevka, Andreevka jáne Chernobaevka aýyldaryna tótenshe jaǵdaı qaýpin boldyrmaý maqsatynda gıdrotorap tranzıttik rejımge kóshirilgen. Qazirgi ýaqytta sý qoımasy sý jınamaı, kelgen sýdy birden tómenge jiberý tártibimen jumys istep tur.

— Gıdrotorapty qaıta jańǵyrtý is-sharasy Qazaqstan Respýblıkasynyń sý salasyn damytýdyń keshendi josparyna engizilgen. Jobany júzege asyrý 2028 jylǵa josparlanǵan. Boljam boıynsha 1,3 mlrd teńge jumsalady, — deıdi «Qazsýshar» kásiporny oblystyq fılıalynyń dırektory Erjan Kýsýmbaev.

Apattyq jaǵdaıda turǵan ekinshi nysan — Ýálıhanov aýdany Tileýsaı aýyly mańyndaǵy sý kótergish bóget.

Bul sý qoımasy dıametri 500 mm bolatyn úsh sıfondyq qubyr arqyly jáne dıametri 1500 mm bolatyn apattyq tasqyn sý aǵyzǵysh arqyly retteledi. Qazirgi tańda úsh sıfondyq qubyrdyń tehnıkalyq jaǵdaıy qanaǵattanarlyq dep tanylǵanymen, apattyq sý aǵyzǵysh jóndeýdi qajet etedi. Al bógettiń jalpy tehnıkalyq jaǵdaıy apatty dep baǵalanǵan.

Sondaı-aq Esil aýdany Esil aýylyndaǵy qysymdy-retteýshi bógettiń jaǵdaıy qanaǵattanarlyqsyz dep tanylǵan. 

Qurylys jumystary aıaqtalǵannan beri nysannyń ysyrmalary kóterilgen kúıde tur. Gıdrotorap sý jınaqtamaıdy. Qazirgi ýaqytta nysan tómen ornalasqan eldi mekenderge qaýip tóndirmeıdi. Alaıda, onyń tolyqqandy jumys istemeýi sý resýrstaryn tıimdi basqarýda ózekti másele bolyp otyr.

Buǵan deıin SQO-da Esil ózeniniń 32 km qamtıtyn túbi tazartylyp, tereńdetiletinin jazǵan edik.