SQO-da eki balanyń ólimine kináli dep tanylǵan meıirbıkege sot úkimi ózgerissiz qaldy

PETROPAVL. KAZINFORM — Soltústik Qazaqstan oblysynda astan ýlanyp qaıtys bolǵan eki balaǵa qatysty istiń núktesi qoıyldy. Medbıke Aıdana Beısembaevaǵa qatysty sot úkimi ózgerissiz qaldy. 

SQO sotynyń málimetinshe, apellıatsııalyq alqa is materıaldaryn qarap, búgin Aıdana Beısembaevaǵa qatysty birinshi satynyń úkimin ózgerissiz qaldyrdy. Maýsym aıynda sot medbıkeni kináli dep tanyp, eki jylǵa kolonııa-qonysqa sottaǵan edi. SQO mamandandyrylǵan aýdanaralyq qylmystyq soty kásibı mindetin tıisti deńgeıde atqarmaǵan medıtsına qyzmetkerine jaza kesip, ol sot zalynda qamaýǵa alyndy.

Esterińizge salaıyq, oqıǵa byltyr 13 maýsymda bolǵan edi. Kovalenko otbasynyń bes adamy keshki as kezinde aýyldaǵy dúkennen satyp alynǵan tushpara men shujyq jep, keıin ýlanyp qalǵan. Olar jergilikti medıtsınalyq pýkntke baryp, kómek suraǵan. Meıirbıke birneshe ret kelip, tıisti em-dom jasaǵan, alaıda sol kúni aýdandyq aýrýhanaǵa habarlap, jetkizbegen. Ekinshi kúni 3 jasar ul men 6 jastaǵy qyz bala qaıtys boldy.

Tergeý qorytyndysy boıynsha 26 jastaǵy medbıke Aıdana Beısenbaevaǵa qatysty qylmystyq is qozǵaldy. Qaıtys bolǵan balalardyń anasy da bolǵan oqıǵaǵa medıtsınalyq qyzmetkerdi kinálady.

Sot úkimi zańdy kúshine endi.

Buǵan deıin SQO-da 38,5 mln teńge kóleminde ınternet-alaıaqtyqqa qatysy bar bes adam ustalǵanyn jazǵan edik.