SQO-da eki aıda 150-ge jýyq mas júrgizýshi ustaldy

PETROPAVL. KAZINFORM — Soltústik Qazaqstan oblysynda eki aıda 58 jol-kólik oqıǵasy tirkelip, saldarynan 10 adam mert boldy.

SQO Polıtsııa departamenti baspasóz qyzmetiniń málimetinshe, Petropavldyń 25 jastaǵy turǵyny «Jetour» markaly avtokólikpen «Chelıabi — Novosibir» avtojolynyń 631 shaqyrymynda ustaldy. Ol ruqsat etilgen 100 km/saǵ jyldamdyqtyń ornyna 151 km/saǵ jyldamdyqpen júrgen. Quqyq buzýshyǵa 20 aılyq eseptik kórsetkish mólsherinde aıyppul salyndy. Júrgizýshige jyldamdyqty shamadan tys asyrýdyń saldary týraly profılaktıkalyq áńgime júrgizildi.

SQO PD bastyǵynyń orynbasary Marat Jumalıevtiń aıtýynsha, qabyldanyp jatqan sharalarǵa qaramastan, eki aıda oblysta 58 jol-kólik oqıǵasy tirkelip, 72 adam zardap shekken, 10 adam kóz jumdy. Oǵan júrgizýshilerdiń tártip saqtamaýy, jyldamdyqty arttyrý, baǵdarsham sıgnaldaryn elemeý sebep bolǵan.

Sondaı-aq eki aıdyń ishinde jol qozǵalysy erejelerin buzýdyń 34 myńǵa jýyq deregi anyqtalyp, 144 mas júrgizýshi ustaldy.

— Jaqynda túngi ýaqytta «Rólde uıqy» atty kezekti aktsııa ótti: medıtsına qyzmetkerlerimen birge alys baǵyttaǵy júrgizýshilerdi toqtatyp, olardyń jaǵdaıyn tekserip, eńbek jáne demalys rejımin saqtaý qajettigin eske saldyq. Reıd barysynda 30 avtokólik júrgizýshisi, onyń ishinde júk kólikteriniń júrgizýshileri qamtyldy. Mundaı is-sharalar jol-kólik oqıǵalarynyń aldyn alýǵa jáne azamattardyń qaýipsizdigin qamtamasyz etýge baǵyttalǵan, — deıdi Ákimshilik polıtsııa basqarmasynyń bastyǵy Altynbek Jamalıev.

Buǵan deıin Almatydaǵy jantúrshigerlik jol apatyna baılanysty polıtsııa qyzmettik tekserýdi bastaǵanyn jazǵan edik.