SQO-da egis alqaptaryna dán sebý jumystary qarqyndy júrgizilýde

PETROPAVL. QazAqparat – Soltústik Qazaqstan oblysynda bıyl kóktemde 4,1 mln ga egis alqabyna dán sebilýi kerek bolsa, sonyń 1,7 mln ga-na nemese 42,3 %-yna daqyldar egildi, dep habarlaıdy QazAqparat tilshisi.

SQO aýyl sharýashylyǵy jáne jer qatynastary basqarmasy baspasóz qyzmetiniń málimetinshe, óńirde kóktemgi egistiń bastalǵanyna bir apta ótti, osy aralyqta 1,7 mln ga alqapqa, sonyń ishinde 1 058,1 myń ga dándi daqyl, 563,2 myń ga maıly daqyl, 25,5 myń ga kartop, 3,8 myń ga kókónis, 66,4 myń ga shóp egilgen.

Bıyl soltústikqazaqstandyq dıqandar egistikti 170 myń tonna mıneraldy tyńaıtqyshtarmen óńdemek. Bul – daqyldardyń shyǵymdylyǵyn arttyrýǵa múmkindik beredi. Sharýalardyń aıtýynsha, óńirde jaýyn-shashyn az bolǵandyqtan tanaptaǵy ylǵal jetkiliksiz. Sondyqtan ótken jylǵy qýańshylyq qaıtalanýy múmkin. Qazirgi tańda dıqandar qolaıly aýa raıyn paıdalanyp, táýlik boıy egis alqaptarynda eńbek etip jatyr.
«Janarmaı 100 % jetedi. 71 myń tonna arzan baǵamen berildi. Tehnıka 100 % daıyn, qazir egis alqaptarynda jumys istep jatyr. Bıyl da jaýyn-shashyn az, oblystyń ońtústik aýdandarynda ylǵal jetkiliksiz. Qyzyljar, Mamlıýt, Esil jáne Aqqaıyń aýdandarynda jańbyr kóp bolǵanymen, Tımırıazev, Aqjar jáne Ýálıhanov aýdandarynda qurǵaqshylyq. Bul shyǵymdylyqqa áser etýi múmkin», - deıdi basqarma basshysy Meıram Meńdibaev.
Bıyl 2,7 mln ga egis alqaby 170 myń tonna tyńaıtqyshpen óńdelmek. Osy kúni 521 myń ga aýmaqqa 35 myń tonna sebildi. Aramshópterge qarsy 3,3 mln ga alqap dárilenedi. Kóktemgi dala jumystaryn merziminde atqarý úshin jedel shtab quryldy, týyndaǵan máseleler osy jerde sheshimin tabady.
Budan basqa jyl basynan 18,1 mlrd teńgege 846 tehnıka satyp alyndy. Oblysta aýyl sharýashylyǵy salasyn qoldaýǵa memleketten bıyl 69,4 mlrd teńge sýbsıdııa bólingen.
Buǵan deıin kekire aramshóbiniń kóbeıýine baılanysty keı aýdandarda karantın aımaqtarynyń bekitilgenin aıtqan edik.