SQO-da egis alqaptaryn hımııalyq óńdeýge 12 mlrd teńge sýbsıdııa bólindi
PETROPAVL. QazAqparat – Soltústik Qazaqstan oblysynyń dıqandary bıyl zııankester jáne túrli ósimdik aýrýlarymen kúresý úshin 3 mln artyq gektardy dárilemek, dep habarlaıdy QazAqparat tilshisi.
Bıyl jaýyn-shashyn az, kún ystyq bolǵanymen dándi daqyldardyń shyǵýy jaman emes. Jaıqalǵan astyqty aram shópten qorǵaý maqsatynda 3 mln artyq gektar gerbıtsıdpen óńdeldi. Qazir aýyl sharýashylyǵy taýaryn óndirýshiler alqaptarǵa fýngıtsıdtti-ınsektıtsıdti preparattardy shashyp jatyr. Bul septorıoz, tat, tozańdy karakúıe sııaqty qaýipti ósimdik aýrýlaryna jáne bıdaı trıpsi sekildi zııankesterge qarsy qolǵa alynǵan shara.
«Sharýalar qajetti hımııalyq dárileý jumystaryn ýaqytynda júrgizip jatyr. Shilde aıynan bastap túrli ósimdik aýrýlary men zııankesterdiń aldyn alý maqsatynda júrgizilse, qazir keı jerlerde olardyń oshaqtary anyqtalyp, kúres bastaldy. Biraq aıtarlyqtaı dúrmek joq. Aldyn ala júrgizilgen jumystar óz nátıjesin berip jatyr», - deıdi SQO Aýyl sharýashylyǵy basqarmasynyń bólim basshysy Baqtııar Toqjigitov.
Hımııalyq dárileý tamyz aıynyń basyna deıin, dándi daqyl pise bastaǵanǵa deıin júrgiziledi. Fıtosanıtarııa qyzmetiniń aldyn ala málimeti boıynsha, Ýálıhanov aýdanynda shegirtke alqaptarǵa zııanyn tıgizýi múmkin. Alaıda, ázirshe oshaqtary anyqtalǵan joq.
«Bıyl alqaptardy hımııalyq óńdeýge 12 mlrd teńge sýbsıdııa bóldi. Bul ótken jylmen salystyrǵanda 4 mlrd teńgege kóp. Sýbsıdııa berý erejesine de ózgeris engizildi. Byltyr tek gerbıtsıdke ǵana demeýqarjy berilse, bıyl fýngıtsıdtti-ınsektıtsıdti preparattardy qoldanǵandar da 50 % jeńildikke ıe bolady. Qazirgi ýaqytta qaýly bekitilip jatyr, qabyldanǵannan keıin dıqandardan ótinishti qabyldaýdy bastaımyz. Olar satyp alǵan preparattarynyń mólsherin, dárilegen alqaptarynyń aýmaǵyn kórsetýleri qajet», - deıdi Baqtııar Toqjigitov.
Bıyl óńirge tyńaıtqyshtarǵa 6,2 mlrd teńge bólindi. Mamandardyń aıtýynsha, qazirdiń ózinde 100 myń tonnadan artyq mıneraldy tyńaıtqysh sýbsıdııalandy. Sharýalardan ótinishter áli kúnge qabyldanyp jatyr.
