SQO-da egis alqabynyń qunarlylyǵyn saqtamaıtyn sharýashylyqtarǵa shara qoldanylmaq

PETROPAVL. QazAqparat – Soltústik Qazaqstan oblysynda jerge mıneraldy tyńaıtqysh seppeıtin, túrli ósimdik aýrýlary jáne aramshóppen kúrespeıtin sharýashylyqtarǵa shara qoldanylmaq, dep habarlaıdy QazAqparat tilshisi.

SQO aýyl sharýashylyǵy jáne jer qatynastary basqarmasynyń basshysy Meıram Meńdibaevtiń aıtýynsha, egis alqaptarynyń shuraıyn saqtap, dándi daqyl men kókónistiń ónimin arttyrý úshin bıyl 3 mln ga aýmaqqa 200 myń tonna mıneraldy tyńaıtqysh qoldanylmaq.

«Mıneraldy tyıńaıtqyshty qoldanýdy jyldan-jylǵa arttyryp kelemiz. Byltyr 171,6 myń tonna 2,7 mln ga alqapqa qoldanyldy. Bul – 2021 jylmen salystyrǵanda 11,6 myń tonnaǵa kóp. Qazirgi ýaqytta mıneraldy tyńaıtqyshty tasymaldaıtyndarmen 130 myń tonnaǵa kelisimshart jasaldy», - deıdi spıker.

Óńirde egin sharýashylyǵymen aınalysatyn 4 myńnan astam agroqurylym bolsa, sonyń shaǵyn úlesi ǵana jerdiń qunarlylyǵyn saqtaý úshin jumys isteıdi.

«Oblys dıqandary mıneraldy tyńaıtqyshty qoldanýda eń tómengi normany qoldanady, ǵylymı negizdelgen mólsher bir gektarǵa 120 keli bolsa, sharýalar sonyń jartysyn ǵana engizip jatyr. Mıneraldy tyńaıtqyshtardy engizý – aýyl sharýashylyǵy maqsatyndaǵy jerlerdi utymdy paıdalaný qaǵıdalarynyń mindetti normasy. Osy norma oryndalmaǵan jaǵdaıda QR Ákimshilik quqyq buzýshylyq týraly Kodekske sáıkes májbúrlep alyp qoıýǵa jatatynyn atap ótkim keledi», - deıdi basqarma basshysy.

Sondaı-aq, bıyl 3,3 mln ga aramshópterge qarsy hımııalyq óńdeý, 894,3 myń ga alqapta zııankester men aýrýlarǵa qarsy óńdeý júrgizilmek.