SQO-da egin oraǵy aıaqtalýǵa jaqyn
PETROPAVL. QazAqparat – Soltústik Qazaqstan oblysynda 13 aýdannyń toǵyzy dándi daqyldardy jınap alyp, kúzgi naýqandy aıaqtady, dep habarlaıdy QazAqparat tilshisi.
Soltústik Qazaqstan oblysy aýa-raıynyń qolaısyzdyǵyna qaramastan bıyl da dándi daqyldan jaqsy ónim aldy. Eginshilikte tıisti tehnologııany qoldaný, tehnıka parkin jańalaý, bilikti mamandardy daıarlaý – óz nátıjesin berip jatyr. Aýyl sharýashylyǵy basqarmasynyń málimetinshe, dıqandar byltyrǵy mejeden kórinip, ár gektardan orta eseppen 17 tsentnerge jýyq ónim aldy.
Dándi daqyldardyń shyǵymdylyǵynan Qyzyljar aýdany alda keledi. Ónimdiligi 22 tsentner. Osy aýdandaǵy «Peterfeld agro» JShS-niń jaz boıǵy eńbegi óz jemisin berip, bul sharýashylyqta dıqandar ár gektardan 31 tsentnerden astyq aldy.
Jumabaev, Músirepov, Taıynsha, Shal aqyn aýdandary birer kúnde kúzgi naýqandy aıaqtaıdy. Jalpy bıyl oblys boıynsha 2 mln 861 myń gektarǵa dándi daqyl sebildi, onyń 2 mln 13 myńy – bıdaı.
Oblys boıynsha maıly daqyldardyń 82,5% jınaldy. Mamandardyń aıtýynsha, shyǵymdylyq jaman emes, qazir orta eseppen 8,5 tsentnerden alynyp jatyr. Bul, ázirshe byltyrǵy kórsetkishten 0,7 tsentnerge tómen.
