SQO-da «Eger men ákim bolsam» atty balalar baıqaýy ótti
PETROPAVL. QazAqparat – QR Memlekettik qyzmet isteri agenttiginiń Soltústik Qazaqstan oblysy boıynsha departamentiniń bastamasymen balalar arasynda «Eger men ákim bolsam» atty shyǵarmalar baıqaýy ótti, dep habarlaıdy QazAqparat tilshisi.
SQO memlekettik qyzmet isteri departamenti baspasóz qyzmetiniń málimetinshe, shyǵarmashylyq baıqaý óńirde 14-30 tamyz kúnderi ótti. Oǵan 12 men 17 jas aralyǵyndaǵy jasóspirimder belsendi qatysty. «Eger men ákim bolsam» taqyrybyna jazylǵan shyǵarmalar jergilikti aqparat portaldarynyń birinde jarııalanyp, sol jerde ár qatysýshynyń týyndysy daýys berý arqyly baǵalandy.
«Balalar arasynda bul baıqaý sonshalyqty qyzyǵýshylyq týdyrady dep kútpedik. Jumystardy qabyldaý merzimi aıaqtalsa da balalardan shyǵarmalar túsip jatty. Ásirese Aqqaıyń jáne Taıynsha aýdandarynyń balalary belsendilik tanytty», - deıdi departamenttiń bas mamany Gúlnara Sársembaeva.
Petropavldaǵy №13 orta mekteptiń oqýshysy Anastasııa Shmıdt óz shyǵarmasyn qazaq tilinde usyndy.
«Barlyq shyǵarmalar mazmundy, árqaısysy erekshe. Sol sebepti bireýin bólip-jaryp aıtý qıyn. Desek te, jeńimpaz saıtta daýys berý arqyly anyqtaldy. Osylaısha Aqqaıyń aýdany Smırnov mektep-gımnazııasynyń oqýshysy, 14 jastaǵy Nıkıta Lısovık birinshi oryndy jeńip aldy. Jasóspirimniń pikirinshe, joǵary laýazymdy adam bedeldi, jaıdary, tez beıimdelgish jáne uqypty bolýy qajet. Balalar taqyrypty ashýǵa tyrysyp, qalyptan tys oı-pikirlerin jazdy. Óz shyǵarmalarynda týǵan jeriniń máselelerin qozǵap, ony sheshý joldaryna deıin usyndy. Keıbiri, tipti, turǵyndardyń jaǵdaıyn jaqsartýǵa qatysty arnaıy baǵdarlama da jazyp shyqqan», - deıdi Gúlnara Sársembaeva.
Balalar bilim berý, densaýlyq saqtaý, qorshaǵan ortany qorǵaý, memlekettik qyzmetter kórsetý sapasyn arttyrý máselelerin qozǵady. Joldardyń nashar jaǵdaıyn, aýyldarda taza sýdyń jetkiliksizdigin jazdy. Jasóspirimderdiń pikirinshe, eldimekenderde balalar men jastardyń bos ýaqytyn ótkizetin oryndar jetkiliksiz, sportty, mýzykalyq bilim berýdi damytý qajet.
«Jasóspirimderdiń aralarynda ákim bolǵysy keletinderi bar, olar bul jumystyń barlyq jaýapkershiligin túsinedi. Ol úshin jaqsy oqý, jan-jaqty bilimdi, saýatty bolý qajet dep sanaıdy. Jalpy bul baıqaý bizdiń balalardyń áleýmettik jaǵdaılarǵa beı-jaı qaramaıtyndyǵyn kórsetti», - deıdi SQO memlekettik qyzmet isteri departamentiniń bas mamany Gúlnara Sársembaeva.
