SQO-da dúnıege kelgenderge qaraǵanda, qaıtys bolǵandar úlesi basym

PETROPAVL. KAZINFORM – SQO-da ólim-jitim sebebiniń ishinde qan aınalym júıesi men júıke aýrýlary aldyńǵy orynda.

Óńirde halyq sany azaıyp keledi. Ulttyq statıstıka bıýrosynyń SQO boıynsha departamentiniń málimetinshe, jyl basynda oblys halqynyń sany 514,2 myń adam bolsa, onyń 258 myńy qalalyq jerlerde, al 256 myń adam aýyldarda turyp jatyr.

Byltyr óńirde 4585 náreste dúnıege keldi. Onyń 2399-y ul bala, 2186-sy qyz. Jańa týǵan sábılerdiń 1884-i, ıaǵnı 41% oblys ortalyǵynda tirkelgen.

Aýdandar boıynsha bala týý deńgeıi ártúrli. Ýálıhanov aýdany alda keledi. Odan keıin Aqjar jáne Shal aqyn aýdandary joǵary kórsetkishtermen erekshelendi. Al eń tómen týý deńgeıi Mamlıýt, Qyzyljar jáne M.Jumabaev aýdandarynda tirkeldi.

Jalpy oblys boıynsha ólim-jitim deńgeıi joǵary kúıinde qalyp otyr. Byltyr óńirde 5963 adam qaıtys boldy. Ólim-jitim sebebiniń ishinde qan aınalymy júıesiniń aýrýlary birinshi tur, Bul barlyq qaıtys bolǵandardyń shamamen 19%-y. Odan keıin 17,7% - júıke júıesiniń aýrýlary, 13,4% - tynys alý organdarynyń aýrýlary, 10% - qaterli isik, 9,6% - as qorytý organdarynyń aýrýlary keledi. Al jazataıym oqıǵalar, ýlaný men jaraqattaný úlesi - 6%.

Osy aralyqta oblysta 2880 neke qıylǵan. Desek te 1689 ajyrasý faktisi tirkeldi.

Buǵan deıin byltyr Qazaqstandaǵy halyq sany 195 480 adamǵa óskenin jazǵan edik.