SQO-da dúnıege kelgenderden qaıtys bolǵandar sany artyq

PETROPAVL. QazAqparat – Soltústik Qazaqstan oblysynda bıylǵy 10 aıda 4 967 adam dúnıege else, 5 845 adam qaıtys bolǵan, dep habarlaıdy QazAqparat tilshisi.

Ulttyq statıstıka bıýrosy SQO boıynsha departamenttiń málimetinshe, bıyl óńirde 4 967 sábı dúnıege kelse, sonyń 41,6 %-y Petropavlda týǵan.

Nárestelerdiń 2 605-i ul, 2 362-si qyz. Demografııalyq kórsetkish boıynsha Ýálıhanov, Shal aqyn jáne Jambyl aýdandary alda keledi.

Eń tómen bala týý kórsetkishi M.Jumabaev aýdanynda. 2021 jyldyń qańtar-qyrkúıek aralyǵynda 5 845 adam qaıtys boldy.

Onyń 19,8 %-y tynys alý músheleri aýrýynan, 14,7 %-ynda qan aınalymy júıesi, 7,3 %-y asqorytý músheleri aýrýlarynan jáne qaterli isikten jáne 6,7 %-ynda jazataıym oqıǵalardan, ýlaný men jaraqattanýdan kóz jumǵan.

Jalpy bıyl 2 648 neke qıylǵan, bul – ótken jylmen salystyrǵanda shamamen 24 %-ǵa joǵary. 544 otbasy ajyrasqan.

Bıyl toǵyz aıdyń ishinde ótken jyldyń osy aralyǵymen salystyrǵanda qonys aýdarýshylar sany 12,4 %-ǵa tómendegen. Kóship ketkender sany 0,5 %-ǵa artqan.

Qonys aýdarý negizinen el ishindegi mıgratsııamen baılanysty. Aımaqtar arasyndaǵy mıgratsııa boıynsha teris saldo ótken jylmen salystyrǵanda 30,9 %-ǵa kóbeıgen.

TMD elderinen keletin ımmıgranttar sany ótken jylmen salystyrǵanda 22,6 %-ǵa, álemniń basqa elderinen 64,4 %-ǵa kemigen. Al TMD elderine emıgratsııa 4,8 %-ǵa zaısa, álemniń basqa elderine qonys aýdarǵandar sany 33,1 %-ǵa artyp otyr.

Osylaısha SQO turǵyndarynyń sany búginde 539,4 myń adamǵa jetti. Onyń 252,9 myńy – qalada turady.