SQO-da dúkenge qaraqshylyq shabýyl jasaý qylmysyn ashýǵa kómektesken taksı júrgizýshisi marapattaldy
ASTANA. QazAqparat - Soltústik Qazaqstan oblysynda dúkenge jasalǵan qaraqshylyq shabýyl qylmysyn ashýǵa kómektesken taksı júrgizýshisi marapattaldy, dep habarlaıdy oblystyq ІІD-niń baspasóz qyzmeti.
«Polıtseılerdiń bastamasymen uıymdastyrylǵan kezdesýde SQO ІІD basshylyǵy júrgizýshilermen, kólik mekemeleriniń jetekshilerimen kezdesti. Qalalyq mádenıet úıiniń zaly lyq toly boldy», delingen habarlamada.
Polıtseıler, kólik mekemeleriniń jetekshileri, júrgizýshiler men taksı júrgizýshileri oblys joldaryndaǵy kólik tártibin talqylady. Tártip saqshylary kezdesýge jan-jaqty daıyndalyp kelgen. Foto kórmesin ázirlep, beınefılm kórsetilimin uıymdastyrdy.
SQO ІІD bastyǵy polıtsııa general-maıory Berik Bilálov kezdesýdiń moderatory retinde oblys joldaryndaǵy apattylyq jaǵdaıy, jol-kólik oqıǵalarynyń aldyn alýǵa baılanysty qabyldanyp jatqan sharalar men jergilikti polıtsııa qyzmetiniń jumysy týraly habardar etti.
Kezdesýde ІІD ÁPB bastyǵy polıtsııa podpolkovnıgi Dáýren Qazbekov, avtokólik júrgizýshilerine kómek kórsetý qoǵamynyń ókili Igor Grıgorenko, kólik mekemesiniń dırektory Bolat Raqymov sóz alyp, qatysýshylardyń suraqtaryna jaýap berdi.
Suraqtar kóptep qoıylatynyn eskergen uıymdastyrýshylar zalǵa birneshe mıkrofon qoıǵan. Qoıylǵan suraqtar jańa baǵdarshamdar ornatýǵa, qıyndyq týǵyzatyn Jabaev-Internatsıonal kósheleriniń qıylysyna, jol jaǵdaıy men qyzmetin zańsyz júzege asyryp júrgen taksı júrgizýshilerine qatysty boldy.
Oblys joldaryndaǵy jalpy kóliktik tártipti jaqsartýdy birlesip sheshý úshin, júrgizýshilerdiń quqyqtary men múddelerin qorǵaý úshin, jol qaýipsizdigin arttyrý úshin, sondaı-aq jol ústinde polıtseılerdiń qatysýymen oryn alatyn keleńsiz jáıttardy, BAQ pen áleýmettik jelilerde jarııalanaty jaǵdaılardyń sheshimin tabý úshin oblystyq polıtsııa vedomstvosynyń bastamasymen Júrgizýshiler odaǵy quryldy.
Kezdesý sońynda tártibi jaqsy júrgizýshiler ІІD bastyǵynyń alǵys hattaryn aldy. «Troechka» taksı parkiniń júrgizýshisi Baıram Kısmatıge aýyr qylmysty ashýda septigin tıgizgeni úshin aqshalaı syıaqy tabys etildi.
