SQO-da dúkender men saýda úıleriniń jumysy saǵat 23.00-ge deıin uzartyldy
PETROPAVL. QazAqparat – Soltústik Qazaqstan oblysynda bas sanıtarııalyq dárigerdiń jańa qaýlysy shyqty, dep habarlaıdy QazAqparat tilshisi.
SQO-nyń bas sanıtarııalyq dárigeri Serikbaı Qasmaqasovtyń jańa qaýlysyna sáıkes dúkender men saýda ortalyqtarynyń jumysy saǵat 23.00-ge deıin uzartyldy.
Qoǵamdyq kólikterge qoıylatyn talaptarda ózgeris bar. Budan bylaı qala ishindegi avtobýstar kondýktorlarsyz jumys isteı almaıdy. Sondaı-aq qarbalas sátte qosymsha kólikter shyǵarylmaq. Óıtkeni júrgizýshiler jolaýshylardy oryn sanyna qaraı ǵana ala alady. Dúısenbi men juma aralyǵynda saǵat 06.30-dan 22.00-ge deıin júretin kólikter demalys kúnderi jumysyn ýaqytsha toqtatady.
Týrızm nysandary, meımanhanalar, demalys úıleri tek 80% ǵana tolyp, kelýshilerdi qabyldaı alady.
Al bazarlar, 2 myń jáne odan da kóp sharshy metr aýmaqty alyp jatqan bólek turǵan saýda úıleri, iri saýda-oıyn-saýyq keshenderi, áýejaılar, temirjol vokzaldary monıtorıng tobynyń tekserisinen soń, nysannyń daıyndyǵyn baǵalaý aktisinen keıin ǵana jumysyn jandandyra alady.
Demalys kúnderi karantındik shekteýler qatańdatylyp, azyq-túlik, qurylys dúkenderi men dárihanalardan basqasy jumysyn toqtatpaq.
Oblystyń bas sanıtarııalyq dárigeri áli kúnge deıin otbasylyq is-sharalardy – toı, qudalyq, batalardy ótkizýge tyıym salynǵanyn eskertedi.
Epıdemıologııalyq ahýal nasharlaǵan jaǵdaıda qaıta karantındik shekeýler kúsheıtilmek.
Aıta keteıik, SQO-da 21 tamyzdaǵy jaǵdaı boıynsha koronavırýs juqtyrýdyń 3822 deregi tirkeldi. 2737 adam - 71% táýir bolyp, 19 adam kóz jumdy.
