SQO-da dúken tonamaq bolǵan kúdikti úsh jasóspirim ustaldy
PETROPAVL. QazAqparat – Soltústik Qazaqstan oblysy Taıynsha aýdanynda úsh jasóspirim dúkenge urlyqqa tústi degen kúdikpen ustaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, 2 qarashaǵa qaraǵan túni polıtsııaǵa Taıynsha aýdany Kellerovka eldimekeniniń turǵyny aryzdanǵan. Ol óz dúkeniniń terezesinen sham jaryǵyn baıqapty. Shaqyrtýǵa ýchaskelik polıtsııa ınspektory jáne onyń kómekshisi kelgen. Olar oqıǵa ornynda 15 jáne 14 jastaǵy eki jasóspirimdi ustady, al úshinshisi polıtseıler kelgen kezde izin sýytqan. Ol Taıynsha aýdany ortalyǵynyń 15 jastaǵy turǵyny bolyp shyqty.
Jasóspirimder dúkenge terezeni buzyp kirgen. Qashqan kezde balalardyń biri túrli taýar salynǵan sómkesin qaldyryp ketken. Sómkeniń ishinde 6 blok sıgaret, bir túıinshek qara temeki jáne 19 qorap saǵyz boldy. Atalǵan fakti Sotqa deıingi tergep-tekserýdiń biryńǵaı tizilimine «Qylmysqa daıyndalý jáne qylmysqa oqtalý» jáne «Urlyq» baptary boıynsha engizildi. Jasóspirimder ata-analarynyń kepilgerligimen bosatyldy. Olar balalarynyń áreketteri úshin qylmystyq, ákimshilik jaýapkershilikke tartylady.
«Osyndaı faktilerdiń jasalýyna jol bermeý úshin ıývenaldyq polıtseılerdiń jumysy kúsheıtildi. Sondaı-aq, ýchaskelik polıtsııa ınspektorlary aýdan kásipkerlerine bıznes nsynadaryn tehnıkalyq nyǵaıtý týraly usynys hattar joldaıdy. Dabylqaqqysh pen beınebaqylaý kameralary – urlyqtyń aldyn alýdaǵy tıimdi shara. Tájirıbe kórsetkendeı, urylar zamanaýı tehnıkalarmen jabdyqtalǵan dúkenderge túse qoımaıdy», - deıdi Taıynsha aýdany polıtsııa bóliminiń bastyǵy Nurlyjan Aqtanov.
SQO-da jyl basynan jasóspirimder 30 qylmys jasaǵan. Onyń basym bóligi – urlyq.
