SQO-da donordyń aǵzalary birneshe adamnyń ómirin saqtap qaldy

PETROPAVL. KAZINFORM – Soltústik Qazaqstan oblystyq kópbeıindi aýrýhanasynda 1985 jyly týyp, qaza tapqan donordan birneshe aǵza alyndy. Otbasynyń kelisimimen júrek, baýyr jáne eki búırek transplantatsııaǵa daıyndaldy.

Densaýlyq saqtaý mınıstrliginiń dereginshe, protsesti Transplantattaýdy úılestirý jáne joǵary tehnologııalyq medıtsınalyq qyzmetter respýblıkalyq ortalyǵy uıymdastyrdy.

Operatsııaǵa Ulttyq ǵylymı kardıohırýrgııa ortalyǵy men UMC transplanttaý brıgadalary, óńirlik úılestirýshiler jáne qajetti medıtsınalyq qyzmetter jumyldyryldy.

- Polıtsııa qyzmetkerleri mamandardyń shuǵyl jetýin qamtamasyz etip, mańyzdy ról atqardy. Bul jaǵdaı donor otbasynyń sheshimimen qatar medıtsına qyzmetkerleriniń, úılestirýshilerdiń jáne memlekettik organdardyń úılesimdi jumysynyń arqasynda ǵana múmkin boldy, - delingen aqparatta.

Mamandardyń aıtýynsha, mundaı qadam júzdegen naýqasqa úmit syılap, ómirin saqtap qalýǵa jol ashady.

Qazirgi tańda Qazaqstanda aǵza transplantatsııasyn qajet etetin 4 300-den astam adam bar, olardyń qatarynda 120-dan astam bala tirkelgen.

Aıta keteıik, buǵan deıin Pavlodarda qaıtys bolǵannan keıingi donor eki adamnyń ómirin saqtap qaldy.