SQO-da dıqandar ár gektardan orta eseppen 9 tsentnerden bıdaı alyp jatyr
PETROPAVL. QazAqparat – Soltústik Qazaqstan oblysynda egin oraǵy bastalyp, dıqandar 551 myń gektardaǵy astyqty ordy, dep habarlaıdy QazAqparat tilshisi.
SQO aýyl sharýashylyǵy jáne jer qatynastary basqarmasynyń málimetinshe, bıyl óńirde 4,3 mln gektarǵa egin egilgen. Onyń 957,6 myń ga maıly daqyldar, 2,9 mln ga dándi-burshaqty daqyldar jáne shamamen 40 myń ga kartop pen kókónis egilgen.
Dıqandar kúzgi oraq naýqanyn bastap ketti. Búginge deıin 551,4 myń gektardan bıdaı oryldy, bul barlyq alqaptyń 18,4 %-y, 380 myń ga bastyrylyp, odan 347,4 myń tonna ónim alyndy. Gektarynan orta eseppen 9,1 tsentnerden astyq alynyp jatyr.
Mamandardyń aıtýynsha, kúzgi oraq naýqanyna 7,1 myń kombaıyn jumyldyrylmaq. Olardyń jartysynan astamy ónimdiligi joǵary zamanaýı tehnıka. Budan basqa jańa astyqty tasymaldaýǵa 6 myńǵa jýyq júk kóligi tartyldy.
Jalpy bıyl sharýashylyqtar 45,1 mlrd teńgege 1687 jańa tehnıka satyp aldy, onyń 112-si astyq kombaındary.
Jańa ónimdi shashpaı-tókpeı, jańbyrǵa qaldyrmaı jınap alý úshin óńirge 75,3 myń tonna dızel otyny qajet. Onyń 86 %-y óńirge jetkizilgen eken. Dıqandarǵa suıyq otynnyń bir lıtri 185 teńgeden satylyp jatyr.
