SQO-da departament basshysy mas kúıinde aıaldamada uıyqtap qalǵan

PETROPAVL. QazAqparat – Soltústik Qazaqstan oblysynda ádep jónindegi keńes Ulttyq ekonomıka mınıstrligi tabıǵı monopolııalardy retteý komıtetiniń oblys boıynsha departament basshysy Abaı Balabekovke qatysty isti qarady, dep habarlaıdy QazAqparat tilshisi.

Memlekettik qyzmet isteri agenttiginiń SQO boıynsha departamenti baspasóz qyzmetiniń málimetinshe, byltyr qazan aıynda Abaı Balabekov qoǵamdyq orynda mas kúıde júrgeni úshin ákimshilik jaýapqa tartyldy. Patrýldi polıtseıler keshki mezgilde ony avtobýs aıaldamasynda uıyqtap jatqan jerinen tapqan.

Balabekovtyń aıtýynsha, ol sol kúni qonaqtan shyǵyp, taksı shaqyrǵan. Taksı uzaq ýaqyt kelmegendikten aıaldamadaǵy oryndyqqa otyrǵan. Osy sátte polıtsııa qyzmetkerleri kelip, ony mas bolǵandyqtan saraptamadan ótýge alyp ketken. Saraptama jeńil alkogoldik masańdyqty kórsetti.

Ákimshilik materıaldy zertteý barysynda 8 qazan saǵat 21:00 shamasynda A. Balabekovtyń Qarasaı stadıonyna qarama-qarsy Jambyl kóshesindegi aıaldamada mas kúıinde uıyqtap, qoǵamdyq tártipti buzǵandyǵy anyqtaldy.

Ádep kodeksine sáıkes memlekettik qyzmetshiler qyzmetten tys ýaqytta jalpy qabyldanǵan moraldyq-ádeptilik normalaryn ustanýǵa, qoǵamdyq oryndarda adamnyń qadir-qasıetin jáne qoǵamdaǵy adamgershilikke nuqsan keltiretin mas kúıde bolý jaǵdaılaryna jol bermeýge, sondaı-aq zańnamada ákimshilik jaýaptylyq kózdelgen teris qylyqtar men ózge de quqyq buzýshylyqtar jasaýǵa jol bermeýge tıis.

Budan basqa, A. Balabekov 2020 jyly jeltoqsan aıynda kólikti mas kúıinde tizgindegeni úshin 7 jylǵa júrgizýshi kýáliginen aıyrylyp, 15 táýlikke ákimshilik qamaqqa alynǵan eken. Osynyń bárin eskere kele Ádep jónindegi keńes daýysqa salý arqyly jumystan shyǵarý týraly usynys shyǵardy.