SQO-da demalys kúnderi polıtseıler joǵalǵan úsh jasóspirimdi izdep tapty
PETROPAVL. QazAqparat – Petropavlda ótken demalys kúnderi úsh jasóspirim joǵalyp, kezekshi táýlik ishinde aman-esen tabyldy, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavl turǵyny «102» jedel arnasyna habarlasyp, saǵat 19.00 shamasynda qydyrýǵa ketken jıeniniń joǵalǵanyn aıtqan. 9 jasar bala Qaraǵandy oblysynan kelgen eken, Petropavldy durys bilmeıdi.
Jasóspirimdi izdeýge ıývenaldy polıtsııanyń barlyq jeke quramy jumyldyryldy. Bala jaıynda aqparat patrýlder men polıtsııa posttaryna taratyldy. Sondaı-aq jasóspirimniń fotosy áleýmettik jelide jarııalanyp, izdeý jarııalandy.
Nátıjesinde saǵat 22.00 shamasynda Petropavl qalalyq polıtsııa basqarmasy patrýldi polıtsııa batalonynyń rota komandıri Saıran Saǵdıev balany Qazaqstan Konstıtýtsııasy-Parkovaıa kósheleriniń qıylysynda baıqap qalady. Jaqyn mańdaǵy № 391 modýldi bekettiń polıtseıi Asylbek Júsipov ekeýi joǵalǵan balany aman-esen týystaryna tapsyrdy. Bala syrǵanaq tebýge shyǵyp, keıin úıge qaıtar joldy umytyp adasyp ketken eken.
Sol kúni keshke qalalyq polıtsııaǵa balalardyń joǵalǵandyǵy týraly taǵy bir habarlama tústi. Jumysshy kenti Dobrolıýbov kóshesindegi úıden 11 jáne 13 jastaǵy aǵaıyndy eki bala eshkimge aıtpaı ketip qalǵan. Jasóspirimderdi izdeýge ıývenaldy polıtseılerden basqa ýchaskelik ınspektorlar, krımınaldy polıtsııanyń qyzmetkerleri shyqty. Balalar kelesi kúni tańerteń aman-esen tabyldy. Olar Jumysshy kentiniń shetinde turatyn tanys kúzetshi-qarııaǵa baryp qonǵan. Tańerteń úıge qaıtyp kele jatqanda olardy polıtseıler kórgen.
Jalpy jyl basynan Petropavl qalalyq polıtsııa basqarmasyna jasóspirimderdiń joǵalýyna baılanysty 9 ótinish túsken. Balalardyń barlyǵy tabylyp, ata-analaryna tabystaldy.
