SQO-da demalys kúnderi kóktaıǵaqtan jaraqat alǵan 30 adam dárigerge júgindi
PETROPAVL. QazAqparat – Soltústik Qazaqstan oblysynda demalys kúnderi 126 adam túrli jaraqatpen aýrýhanaǵa kelse, sonyń 30-y kóshede jaraqattanǵan, dep habarlaıdy QazAqparat tilshisi.
Petropavldaǵy №3qalalyq aýrýhananyń jaraqat bóliminiń meńgerýshisi Valerıı Grıbashovtyń aıtýynsha, bıyl kóktaıǵaqtan zardap shegýshiler qatary az. Ázirge aýa raıy qolaıly, ıaǵnı jyldaǵydaı qatty kóktaıǵaq joq.
Desek te, dárigerler jumyssyz otyrǵan joq. Tek sońǵy úsh táýlikte jaraqat bólimine kómek surap 126 adam kelgen.
«Onyń tek 30-y ǵana jaraqatty kóshede alǵan. Keshe tobyǵyn syndyryp alǵan áıel kelip, oǵan birden kómek kórsetildi. Búgin kóshede kele jatyp, qulap aıaǵyn syndyrǵan taǵy bir adam jetkizildi. Qazir ony operatsııaǵa daıyndap jatyrmyz. Uzaq emdeledi. Eki aı gıpste jatady», - deıdi Valerıı Grıbashov.
Mamannyń aıtýynsha, kóshede jaraqat alatyndar negizinen tobyǵyn ne ıyǵyn shyǵarady nemese aıaǵyn syndyrady. Al mundaı jaraqattar uzaq emdeledi eken.
«Aldymen súıek ornyna kelip, durys bitýi úshin gıps salynady, onymen birer aı júredi. Keıin eń keminde eki aptadaı ońaltýdan ótýi kerek. Jalpy kóktaıǵaqtyń zardabyn tartpaý úshin qarapaıym qaýipsizdik erejelerin saqtaǵan jón. Máselen mundaı kúnderi jańa aıaq kıimdi emes, úırengen etikke tańdaý jasap kıgen jón. Sondaı-aq barar jerge asyqpaı jetý úshin kóktaıǵaqta úıden erterek shyǵý kerek», - deıdi tájirıbeli dáriger.
