SQO-da demalys kúnderi karantın sharalary kúsheıtiledi
PETROPAVL. QazAqparat – Soltústik Qazaqstan oblysynda demalys kúnderi karantındik shekteý sharalary qatańdatylady. Shaǵyn dúkender men dárihanalardan basqa barlyq kóńil kóterý jáne qyzmet kórsetý ortalyqtary jabylady. Bul kúnderi qoǵamdyq kólik te ýaqytsha jumysyn toqtatpaq, dep habarlaıdy QazAqparat tilshisi.
SQO Taýarlar men kórsetiletin qyzmetterdiń sapasyn baqylaý departamenti baspasóz qyzmetiniń málimetinshe, búgin oblystyń bas sanıtar dárigeriniń qaýlysy shyqty. Ol 27 maýsym saǵat 00.00 kúshine enip, 29 maýsym kúni saǵat 00.00 kúshin joıady.
Bul kúnderi oblys turǵyndaryna týǵan-týys, tanystaryn aralaýǵa, otbasylyq is-sharalardy ótkizýge shekteý qoıylmaq. Sondaı-aq óńir boıynsha jáne eldi mekenderde jaıaý, jeke kólikpen qatynaýǵa tyıym salynady. Turǵyndar úıden tek jumysqa baryp, jaqyn mańdaǵy dúken men dárihanadan kerek-jaraǵyn alý úshin jáne úı janýarlarymen ǵana shyǵa alady.
Demalys kúnderi oblystaǵy barlyq sýpermarketter men gıpermarketter, saýda ortalyqtary, bazarlar, oıyn-saýyq, bıznes ortalyqtar, qyzmet kórsetý ortalyqtary, monshalar, qoǵamdyq tamaqtaný oryndary, týrızm nysandary men meımanhanalar, jaǵajaılar, sport-mádenıet-dinı nysandar, úıirmeler ýaqytsha jumysyn toqtatady. 27-28 maýsym kúnderi qoǵamdyq kólik te qatynamaıtyn bolady.
Páter ıeleri kooperatıvteri basqa da seriktestiktermen birge balalar jáne sport alańdaryn, úılerdiń kireberisterin zararsyzdandyrýǵa mindetti. Kásiporyndar men uıymdardyń basshylary da ǵımarattardaǵy óndiristik jáne turmystyq bólmelerde tolyq tazalaý jumysyn júrgizýi tıis.
Mamandar mundaı qatań sharalarǵa koronavırýsty ınfektsııany juqtyrýshylar sanynyń artýyna baılanysty barýǵa májbúr. Buǵan deıin SQO-da tek bir aptada aýyrǵandar sanynyń birden 32% artqanyn aıtqan edik.
Qazir óńir aýrýhanalarynda qaterli indetti juqtyrǵandarǵa arnalǵan bólimder 71% tolǵan.
