SQO-da demalys kúnderi aýyl sharýashylyǵy jármeńkeleri ótip jatyr

PETROPAVL. QazAqparat – Soltústik Qazaqstan oblysynda azyq-túlik baǵasyn turaqtandyrý maqsatynda sáýir aıynan beri aýyl sharýashylyǵy jármeńkeleri ótip keledi. Osy aralyqta 46 mln teńgeniń ónimi satyldy, dep habarlaıdy QazAqparat tilshisi.

SQO aýyl sharýashylyǵy jáne jer qatynastary basqarmasynyń málimetinshe, aýyl sharýashylyǵy jármeńkeleri – azyq-túlik baǵasyn turaqtandyrýdyń bir joly. Birneshe jyl qatarynan ótkizilip kele jatqan is-sharaǵa turǵyndar da, aýyl sharýashylyǵy taýaryn óndirýshiler de belsene qatysady.

Aýyl sharýashylyǵy jármeńkeleri ár senbi-jeksenbi saıyn Petropavldaǵy «Darııa», «Altyn Arman», «Qyzyl Jar-Aqbastaý» bazarlarynda ótedi. Oǵan ár apta saıyn kezekpen 6 aýdannan qatysady. Bul jerde aýyldyqtar deldalsyz óz ónimderin tıimdi baǵaǵa sata alady. Sórege jumyrtqa, et, bal, balyq, kartop, sút ónimderi sııaqty 20-dan astam ónim shyǵarylady.

Jármeńkege oblystyń aýyl sharýashylyǵy ónimin shyǵaratyn jáne óńdeıtin iri kásiporyndary da qatysady. Taýar naryqtaǵy baǵadan 10-20%-ǵa arzan.

Petropavlda sáýir aıynan beri aýyl sharýashylyǵy jármeńkesi 21 ret ótken. Osy aralyqta 46,3 mln teńgeniń ónimi satyldy. Sonyń ishinde 17,8 mln teńgege 11 tonna et, 5,7 mln teńgege 18 myń dana jumyrtqa, 10 mln-nan artyq teńgege 11 tonnadan astam sút ónimderi saýdalanǵan.