SQO-da demalys kúnderi 300-ge jýyq adam koronavırýs juqtyrdy

PETROPAVL. QazAqparat – Soltústik Qazaqstan oblysynda sońǵy 4 aıda 294 adam koronavırýstan kóz jumsa, 4 naýqas demalys kúnderi qaıtys boldy, dep habarlaıdy QazAqparat tilshisi.

SQO densaýlyq saqtaý basqarmasynyń málimetinshe, óńirde ótken táýlikte 141 adam koronavırýs juqtyrdy. 13 qarasha kúni qaýipti ınfektsııany juqtyrýdyń 157 jańa jaǵdaıy anyqtaldy. Al, qarasha aıy bastalǵaly 2 133 adam aýyrǵan. Osylaısha, oblys aýrýdyń kúndelikti taralýy boıynsha elimizde kósh bastap tur. Qazir ınfektsııalyq statsıonarlarda 677 adam em alyp jatyr, taǵy 51-i jansaqtaý, 8-i karantın bólimshelerine ornalastyrylǵan. Jalpy juqtyrǵandar sany 30 941 adamǵa jetti.

Qaıtys bolǵandar boıynsha kórsetkish de kúndelikti ósip keledi. Pandemııa bastalǵaly óńirde 337 adam koronavırýstan kóz jumdy. «Delta» shtamm paıda bolǵaly ólim-jitim kúrt ósip, sońǵy tórt aıda 294 adam qaıtys boldy. Olardyń ishinde vaktsına alǵan 11 adam bar. Al demalys kúnderi taǵy 4 naýqas kóz jumdy.