SQO-da demalys kúnderi 20 shaqty órt tirkeldi
SQO tótenshe jaǵdaılar departamentiniń málimetinshe, jyl basynanóńirde 250 órt tirkelip, 24 adam mert boldy, 5 adam kúıik aldy. 13 adamǵa, sonyń ishinde 4 balaǵa ıis tıip, ýlandy. Materıaldyq shyǵyn 160 mln teńgeden asady.
Órt qaýipti kezeń bastalǵaly 19 orman órti tirkeldi.
Al Petropavlda jyl bastalǵaly 76 órt bolǵan, 209 janý jaǵdaıy tirkeldi, qýraǵan shópke ot qoıýdyń 83 faktisi anyqtaldy. 20 shaqty adamǵa jalpy somasy 245 myń teńge jáne zańdy tulǵalarǵa 918 myń teńge aıyppul salyndy.
«Sońǵy iri órt 8 mamyr kúni Petropavldaǵy Kopaı yqsham aýdanynda tirkeldi. Birden jeke turǵan úsh úıde órt shyqty. Mamandar kelgen kezde ol úıler otqan oranyp úlgeripti. Ǵımarattardyń tyǵyz ornalasýyna baılanysty órt tez taraǵan. Belgisiz bireýlerdiń otty abaısyz qoldanýy sebep bolǵan. Órtti sóndirý kezinde 4 gaz ballony qaýipsiz jerge shyǵaryldy. Qaza tapqandar, zardap shekkender joq. 9 mamyr kúni taǵy da osy aýdanda qamystan órt shyǵyp, jalyn jeke turǵyn úılerge aýysty, birneshe qora-qopsy janyp ketti. Qazir qýraǵan qamysqa kimniń ot qoıǵany anyqtalyp jatyr», - deıdi Petropavl qalalyq TJ basqarmasy bastyǵynyń mindetin atqarýshy Ázimhan Merǵasymov.
Mamannyń aıtýynsha, buǵan deıin saıajaı seriktestikterinde bolǵan órtten 200-den astam qurylys nysany janyp ketken. Órttiń shyǵýyna kináliler anyqtalyp, olar ákimshilik jaýapkershilikke tartyldy. Jeke tulǵalarǵa 20 AEK deıin aıyppul qarastyrylǵan.
9 mamyr kúni Petropavldaǵy Nazarbaev kóshesi, 121 meken jaıyndaǵy kóp qabatty úıdiń 5 qabatynda órt shyqty. Elektr qýatyn taratatyn qorapshada symdardyń qysqa tuıyqtalýy bolǵan. Saldarynan páterdiń as bólmesindegi tońazytqysh lapyldap janyp, jalyn lezde basqa bólmelerge taraǵan. Mamandar kelgen kezde esik syrtynan jabyq bolǵan. Turǵyndar ózdiginen shyǵa almaı, balkonda qutqarýshylardy kútken. Órt sóndirýshiler aldymen turǵyndardy qutqaryp, keıin jalyndy aýyzdyqtady.
