SQO-da daýyldy eskertý jarııalanyp, barlyq baǵyttaǵy avtojoldar jabyldy
PETROPAVL. QazAqparat – Soltústik Qazaqstan oblysynda borannyń kúsheıýine baılanysty barlyq baǵyttar boıynsha avtojoldar jabyldy, dep habarlaıdy QazAqparat tilshisi.
SQO Tótenshe jaǵdaılar departamentiniń málimetinshe, óńirdegi barlyq baǵyttaǵy avtomobıl joldary kóliktiń barlyq túrleri úshin saǵat 15.15-ten bastap jabyldy. Buǵan deıin respýblıkalyq mańyzdaǵy keı joldardyń jabylǵany týraly aıtqan edik.
Sondaı-aq 12-13 naýryzǵa óńirde daýyldy eskertý jarııalandy. «Qazgıdromet» RMM SQOF málimetinshe, aldaǵy eki kúnde oblysta aýa raıy kúrt sýytýy múmkin. Aýa temperatýrasy -13-16-dan keı jerlerde -25-30-ǵa deıin tómendemek.
Osyǵan baılanysty SQO TJD mamandary aldaǵy kúnderi asa qajettiliksiz úıden shyqpaýdy, kólikpen alys jolǵa saparlamaýdy jáne ań jáne balyq aýlaýdan ýaqytsha bas tartýdy suraıdy. Kómek qajet bolǵan jaǵdaıda 112 telefon nómirine habarlasýǵa bolady.
