SQO-da dástúrli «Soltústik-2020» qysqy sport oıyndarynyń jeńimpazy anyqtaldy

SQO Dene shynyqtyrý jáne sport basqarmasy baspasóz qyzmetiniń málimetinshe, «Soltústik-2020» oıyny óńirdegi basty sporttyq is-sharalardyń biri. Birneshe myń áýesqoı sportshynyń basyn biriktiretin jarysqa oblystyń barlyq aýdandary qatysyp, kezeń-kezeńmen jarysady.

Bıyl «Soltústik-2020» týrnıriniń qorytyndy oıyndary Tımırıazev aýdanynda ótti. Tımırıazev aýdanyna 13 aýdannan 40-den astam sportshy jınaldy. Olar shaıbaly hokkeıden, fýtzaldan, shańǵy jarysynan jáne short-trekten ózara myqtyny anyqtady.

Qysqy sporttyq merekege kelgenderdi oblys ákiminiń orynbasary Rýslan Álishev quttyqtady.

«Búgingi kúni SQO-da sportpen aınalysýǵa bar jaǵdaı jasalynǵan. Bıyl bul salaǵa bólingen qarajat 32 % artty. Ótken jyly 21 sporttyq nysan qoldanysqa berildi. Bıyl olardyń qataryna taǵy 48-i qosylady. Sonymen qatar oblysta 400 hokkeı korty bar. Onyń 350-i aýyldy jerlerde ornalasqan. Barlyq qatysýshylardy qysqy sport merekesiniń ashylýymen quttyqtaımyn. Tek qana bıikten kórinińizder», - dedi Rýslan Álishev.

Jergilikti kásipkerler de «Týǵan jer» jobasy aıasynda sporttyń damýyna óz úlesterin qosyp keledi. Olar óz qarajattaryna Maǵjan Jumabaev aýdanynda eki sport nysanyn saldy. Zagradovka jáne Novonıkolskoe eldi mekenderinde jabyq hokkeı korttary paıdalanýǵa berildi. Bıyl Tımırıazev aýdanynda kásipkerler men memlekettiń birlesken jumysy nátıjesinde jabyq kort salynbaq.

Al úsh kúnge jalǵasqan tartysty oıynda jalpy komandalyq esepte birinshi oryndy jáne kýbok pen 300 myń teńgeni 186 upaımen Ǵ.Músirepov aýdany ıelendi. Ekinshi oryn men 200 myń teńgeni 142 upaımen Aqqaıyń aýdany alsa, Shal Aqyn aýdanynyń sportshylary úshinshi orynnan kórindi. Olarǵa 100 myń teńge syıǵa berildi. Al spartakıada ıeleri – tımırıazevtyqtar 4 oryndy mise tutty. Olarǵa qysqy sporttyq oıyndy joǵary deńgeıde uıymdastyrǵany úshin «Gazel» avtokóligi tabystaldy. Kelesi jyly «Soltústik» oblystyq qysqy sport merekesi Taıynsha aýdanynda ótedi.