SQO-da daryndy polıtseılerdiń respýblıkalyq art-festıvali ótti
PETROPAVL. QazAqparat – Petropavlda daryndy polıtseılerdiń basyn qosqan «Ár júrekte – týǵan jer» atty patrıottyq ánderdiń respýblıkalyq art-festıvali ótti, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, 14 óńirdiń aımaqtyq baıqaýlarynyń júldeli oryn ıegerleri «Dýet», «Trıo», «Kvartet» nomınatsııalarynda baqtaryn synap, sońǵy týrǵa qatysty.
Festıvaldiń ashylý saltanatyna oblys ákiminiń orynbasary Rýslan Álishev qatysty. Al qorytyndy týrdy uıymdastyrǵan SQO Polıtsııa departamenti respýblıkalyq baıqaýdyń joǵary deńgeıde ótýine kúsh saldy.
Jastar jylyna oraı qolǵa alynǵan is-sharaǵa jasy otyzǵa deıingi daryndy polıtseıler qatysty. Olardyń ónerin «Astana opera» Memlekettik opera jáne balet teatrynyń dırıjeri Abzal Muhıtdınov, ánshi-sazger Soldathan Ysqaq jáne QR ІІM Kadrlyq saıasat departamentiniń bastyǵy Aıdar Saıtbekov baǵalady.
«Jyldan jylǵa baıqaýǵa qatysýshylardyń deńgeıi artyp keledi. Olar repertýardy da jaýapkershilikpen tańdaıtyn bolǵan. Jalpy, bul festıvaldi ótkizýdegi maqsat – polıtseılerdiń shyǵarmashylyq qabiletterin arttyrý, olardyń mádenı deńgeıin jáne qyzmettiń mártebesin arttyrý, patrıottyq tárbıe berý», - dedi qazylar alqasynyń tóraǵasy Aıdar Saıtbekov.
«Dýet» nomınatsııasynda SQO Polıtsııa departamentiniń ónerpazdary birinshi oryn aldy. «Trıo» nomınatsııasynda Aqtóbe oblysynyń arnaıy mamandandyrylǵan qyzmet basqarmasy ánshileri jeńiske jetse, «Kvartet» nomınatsııasynda Qostanaı oblystyq Polıtsııa departamentiniń qyzmetkerlerine teń keler jan bolmady.
