SQO-da dárihanalarǵa qatysty toltyrylǵan 16 hattamanyń 12-sin sot keri qaıtardy
PETROPAVL. QazAqparat – Soltústik Qazaqstan oblysynda monıtorıngtik toptar dárihanalardy tekserip, 2 mln astam teńgeniń ákimshilik quqyqbuzýshylyq týraly 16 hattamasyn toltyrdy. Alaıda, onyń 12-sin sot istiń tolyq bolmaýynan qaıtardy, dep habarlaıdy QazAqparat tilshisi.
SQO-da densaýlyq saqtaý uıymdaryndaǵy búgingi jaǵdaı týraly brıfıng ótip, halyqqa medıtsınalyq qyzmet kórsetýdiń sapasy, olardyń ýaqytyly ári tolyq júrgizilýi boıynsha qurylǵan monıtorıngtik toptyń jetekshisi, Sybaılas jemqorlyqqa qarsy qyzmet jetekshisiniń birinshi orynbasary Nurlan Jahın qatysty.
Nurlan Jahınniń aıtýynsha, ótken aptanyń sáıkes kezeńimen salystyrǵanda, oblysta syrqattanýshylar sanynyń 2 esege tómendeýi baıqalady. Infektsııa juqtyrǵandarǵa arnalǵan 470 orynnyń 25% jáne provızorlyq 935 orynnyń 29% ǵana qamtylǵan.
«Júrgizilip jatqan jumystyń nátıjesinde úsh aptada provızorlyq jáne ınfektsııalyq statsıonarlarǵa emdeýge jatqyzý 9 esege qysqaryp, 271-den 30 adamǵa jetti. Sondaı-aq jedel járdem shaqyrýlary 2 esege - 712-den 350-ge deıin tómendedi. 26 tamyzdan bastap 595 tósek-oryny - 190 ınfektsııalyq jáne 405 provızorlyq tósek-oryn qysqarady», - deıdi monıtorıngtik top jetekshisi.
Oblysta kún saıyn dári-dármekterge jáne olardyń baǵasyna monıtorıng júrgiziledi. Dári-dármekpen qamtamasyz etýde problema joq. Búgingi kúni statsıonarlarda aılyq qor bar.
Sonymen qatar, farmatsevtıkalyq qyzmetti baqylaý boıynsha SQO Polıtsııa departamentimen birge óńirdiń dárihanalaryna tekseris uıymdastyryldy.
«Monıtorıng nátıjesinde 2 mln astam teńgeniń ákimshilik quqyq buzýshylyq týraly 16 hattamasy toltyryldy. Búginde onyń 2-ýi sotta qaralyp jatsa, 1 materıal jumysta, 12-si qaıtaryldy. Oǵan sebep - qylmystyq is-áreket belgileriniń joq nemese bar ekendigi týraly málimetterdiń usynylmaýy», - deıdi Nurlan Jahın.
