SQO-da dárigerler jatyr mıomasyna tiliksiz ota jasaýdy meńgerdi
PETROPAVL. QazAqparat – Soltústik Qazaqstan oblysynda dárigerler alǵash ret jatyr mıomasyn jáne qýyqasty bezi adenomasyn embolızatsııalaý otasyn jasady, dep habarlaıdy QazAqparat tilshisi.
Dárigerlerdiń aıtýynsha, bul ota biregeı, narkozsyz jáne pyshaqsyz jasalady. Ol úshin jambasta kishkentaı tesik jasalyp, qan tamyryna mıkrokateter engiziledi. Osylaısha qatersiz isikti qorektendirip turǵan jerge qan kelýi toqtaıdy da, mıoma ósýdiń ornyna, kerisinshe kishireıe bastaıdy. Shamamen bir jyldyń ishinde onyń belgileri tolyǵymen joıylady.
«Bul tehnologııany álem dárigerleri burynnan qoldanady. Elimizde de osy tásilmen on jylǵa jýyq ota jasalyp keledi. Endi biz de qolǵa almaqpyz. Jatyr mıomasy jáne qýyqasty bezi adenomasy bar syrqattar kóp. Buryn olar basqa qalalarǵa baryp, ota jasatatyn. Ereksheligi – syrqat ekinshi kúni aıaǵyna turady. Eshqandaı tigis, asqyný bolmaıdy. Embolızatsııadan keıin áıeldiń bala kóterý fýnktsııasy saqtalady», - deıdi kardıologııalyq ortalyqtyń rentgenendovaskýlıarlyq hırýrgııa jáne sáýleli dıagnostıka bólimshesiniń meńgerýshisi Dmıtrıı Te.
Alǵashqy ota Nur-Sultan qalasyndaǵy Ulttyq onkologııa jáne transplantologııa ortalyǵynyń mamany Evgenıı Mýnniń jetekshiligimen jasaldy. Petropavl qalasynyń turǵyny Elena Voronına 36 jasta, úsh balasy bar. Oǵan otany jarty saǵatyń ishinde jasapty.
«Narkozsyz jasady, men esimdi bilip jattym. Otadan keıin dárigerlerdiń baqylaýynda boldym, qazir jaǵdaıym jaqsy. Osydan 3 kún aýrýhanaǵa aýyryp tústim. Maǵan dárigerler embolızatsııa jasaýdy usyndy. Bas tartqan joqpyn. Mamandarǵa alǵysym sheksiz», - deıdi Elena.
Dárigerlerdiń aıtýynsha, qýyqasty bezi adenomasymen negizinen jasy kelgen er adamdar aýyrady. Olarda kóbine qant dıabeti, joǵary qan qysymy, sozylmaly búırek aýrýy sııaqty ilespe aýrýlar kezdesedi. Mundaıda embolızatsııa jasaý tıimdi.
«Embolızatsııany naýqastar jaqsy kóteredi. Ota kóp bolsa bir saǵatqa ǵana sozylady. Bul – shyǵyndy tehnologııa, desek te ol ózin aqtaıdy. Syrqattar tez táýir bolady. Aýrýhanada kóp ustap qajet emes, úırenshikti ortasyna tez qosylady», - deıdi Dmıtrıı Te.
