SQO-da dárigerler óńesh obyrynyń qaı ýaqytta paıda bolatynyn aıtty
SQO onkologııalyq ortalyqtyń onkohırýrgi Vıktor Fresherdiń aıtýynsha, óńesh obyry - bul óte jıi kezdesetin qaterli isik, Dúnıejúzilik densaýlyq saqtaý uıymynyń málimetteri boıynsha taralýy jaǵynan 6-shy orynda. Óńirde byltyr jańadan 34 adamda anyqtalsa, 2020 jyly 38 jaǵdaı tirkelgen.
«Óńesh qaterli isiginiń paıda bolýyna ne sebep? Ár túrli titirkendirgish faktorlardyń áserinen ezofagıt - óńeshtiń sozylmaly qabynýy paıda bolady, keıin ol qaterli isikke aınalady. Aýrýdyń damýyna temeki men spırttik ishimdikter, durys tamaqtanbaý, quramynda aýyr metaldar bar sapasyz aýyz sý ishý, óńeshtiń hımııalyq kúıik alýy, zııandy óndiriste jumys isteý, óte ystyq sýsyn ishý, qatty tamaqtan nemese bógde zattan óńeshtiń shyryshty qabyǵyna mehanıkalyq zaqym áser etedi. Bastapqyda aýrý baıqalmaıdy, keıin yńǵaısyzdyq keltirip, qatty tamaq ishý qıynǵa soǵady, óńeshte «kesek» turǵandaı jutýǵa kedergi keltiredi», - deıdi dáriger.
Óńesh obyry úlkeıe kele jutqynshaqta aýyrsyný paıda bolady. Júrek aınyp, qusý jıileıdi. Durys tamaqtana almaǵandyqtan, dıstrofııa paıda bolady, adam álsireıdi, salmaǵyn joǵaltady, anemııaǵa ushyraıdy. Adam únemi ash sezimde júredi, tiliniń ústinde aqshyl-sur jabyndy paıda bolady.
«Óńesh qaterli isiginde traheıanyń titirkenýine baılanysty turaqty qurǵaq jótel, daýystyń shyqpaýy, qan aralas qaqyryqty jótel bolyp, aýyzdan jaman ıis shyǵýy múmkin. Keı jaǵdaıda adamnyń dene qyzýy kóteriledi. Al obyrdyń sońǵy kezeńinde isik óńesh arqyly tamaqtyń ótýine jol bermeıdi. Buǵana mańynda úlkeıgen lımfa túıinderin baıqaýǵa bolady. Óńesh qaterli isigi, ádette, óte baıaý damıdy, desek te óńesh qaterli isiginiń alǵashqy belgilerinde birden dárigerge kóriný kerek», - deıdi Vıktor Fresher.
Dárigerdiń aıtýynsha, obyr aýrýynda neǵurlym erte mamanǵa kóringen tıimdi. Syrqat tıisti tekserýlerden ótip, dárigerdiń boljamy rastalǵan jaǵdaıda, em-dom sharalary qolǵa alynady. Óńesh qaterli isigin emdeýdiń birneshe ádisi bar. Bul aýrýdyń qaı kezeńde anyqtalǵanyna, naýqastyń jasyna, onyń jalpy jaǵdaıyna baılanysty qoldanylady.
SQO-da qazirgi ýaqytta 70 adam qaterli óńesh isigimen esepte tur. 2020 jyly - 21, byltyr 10 naýqas qaıtys boldy.