SQO-da «Dáriger-volonter» pılottyq jobasy jumys istep jatyr
SQO-daǵy «Dáriger-volonter» qozǵalysynyń úılestirýshisi Rústem Armanovtyń aıtýynsha, elimizde volonterliktiń bul túri endi damyp keledi. Mysaly Reseıde onyń negizi 2013 jyly qalansa, 2016 jyly resmı mártebe aldy. Qazir kórshi elde qoǵamdyq uıymǵa 50 myń adam múshe. SQO-da bul qozǵalys memlekettik áleýmettik tapsyrys boıynsha 2019 jyldyń qazan aıynda quryldy.
«Elimizdiń keı aımaqtarynda medıtsına salasynda ózdiginen jumys isteıtin eriktilerdiń barlyǵyn bilemiz. Bıyl Volonterler jyly bolǵandyqtan kóptegen medıtsınalyq oqý oryndary ózderinde osyndaı qozǵalysty qurady degen oıdamyz. Al bul óz kezeginde Qazaqstandaǵy densaýlyq saqtaý salasynda volonterlikti damytady», - deıdi Rústem Armanov.
Pılottyq joba bolǵandyqtan oǵan M.Qozybaev atyndaǵy SQMÝ-niń Joǵary Medıtsına Mektebinen jáne joǵary medıtsınalyq kolledjinen 10 úzdik stýdent iriktelip alynǵan. Olar 16-22 jas aralyǵyndaǵy bolashaq jalpy tájirıbe dárigerleri, feldsherler, medbıkeler.
«Óz qatarymyzǵa tek medıtsınalyq oqý oryndarynyń stýdentterin jáne medıtsınalyq bilimi bar mamandardy ǵana alamyz. Negizinen tirek-qımyl apparatyn saqtaýdyń daǵdylaryn úıretýge, alǵashqy medıtsınalyq kómek kórsetýge jáne fızıoterapııa ádisterin úıretýge baǵyttalǵan aqparattyq-tanymdyq jumystarmen aınalysamyz. Máselen, orta synyp oqýshylary úshin «tuz+ıod iQ saqtaıdy« atty aktsııany ótkizdik. Sondaı-aq, ata-ájelerge baryp qan qysymyn ólshep, gıpertonııanyń aldyn alý maqsatynda reıdtik is-sharalar júrgizdik», - deıdi volonter.
Rústem Armanovtyń mamandyǵy - «feldsher», búginde bilimin shyńdap, «densaýlyq saqtaý salasyndaǵy menedjment» mamandyǵy boıynsha oqyp jatyr. Kınezıoterapııa ortalyǵynda emdik dene shynyqtyrýdan nusqaýshy bolyp eńbek etedi. Onyń aıtýynsha, volonterlikpen aınalysý – júrekke jylýlyq syılap, pozıtıvti emotsııa beredi. Sondaı-aq adamdarmen qarym-qatynas jasaı otyryp, mol tájirıbe alady eken.
«Dáriger-volonter» qozǵalysyna nıettes adamdar kerek. Komandanyń quramyn keńeıtý qajet. Qazir Petropavldaǵy joǵary medıtsınalyq kolledjde «Qaıyrymdylyq» klýby jumys istep jatyr. Oǵan 50 stýdent múshe. Tótenshe jaǵdaı aıaqtalysymen eki qozǵalystyń jumysyn úılestire alamyz. Barlyq tilek bildirýshilerdi qajetti bilim men daǵdylarǵa úıretip, olardy dári qobdıshalarmen jáne qural-saımandarmen qamtamasyz etemiz», - deıdi Rústem Armanov.
Al ázirshe tótenshe jaǵdaı rejıminde dáriger-volonterler óńirdegi basqa eriktilermen birge jalǵyzilikti qarttarǵa, múgedekterge antıseptıkalyq buıymdardy, dári-dármekti taratýǵa kómektesip júr.