SQO-da dári-dármek baǵasyn negizsiz ósirgenderdi jumys toby anyqtaıdy
«Qyzyljar – adaldyq alańy» jobalyq keńsesiniń jetekshisi Amangeldi Satanovtyń aıtýynsha, óńirde qurylǵan jumys tobyna jergilikti polıtsııa qyzmetiniń ókilderi, sybaılas jemqorlyqqa qarsy qyzmet mamandary, sanıtarııalyq dárigerler, densaýlyq saqtaý basqarmasy qyzmetkerleri kiredi. Olar eń aldymen áleýmettik jelilerge monıtorıng jasaı otyra dárihanalardaǵy jaǵdaıdy baqylaýda ustamaq.
«Elde epıdemıologııalyq jaǵdaı ýshyǵyp tur. Dári-dármektiń negizsiz qymbattaýyna jol bermeý maqsatynda tekserister júrgiziledi. Turǵyndar vırýsqa qarsy preparattardy taba almaı júr. Keı dárihanalarda paratsetamol-aspırın múldem bolmasa, keıbiri onyń baǵasyn aspandatyp jibergen. Mundaı jaǵdaı búkil el boıynsha baıqalýda», - deıdi onlaın brıfıng ótkizgen Amangeldi Satanov.
Onyń aıtýynsha, keı óńirlerde paratsetamoldyń kádimgi saýda ortalyqtarynda satylǵandyǵy anyqtalǵan. Mundaıǵa jol bermeý maqsatynda jaǵdaı baqylaýǵa alynbaq.
«Qazir syrqattanǵandar sany artyp keledi, otbasyńyzda aýyrmasa da, tanystaryńyzdyń, dostaryńyzdyń, týystaryńyzdyń ishinde aýyrǵandar bar. Dárihanalarǵa barǵan jaǵdaıda baǵanyń qymbattaǵanyn kórseńiz, ne bolmasa satylymda bolmasa, basqa saýda oryndarynda, tipti olx-te satylyp jatqanyn kórip qalsańyz WhatsApp jelisine habarlańyz. Qoǵamdyq baqylaý kartasynyń 87075641424 nómirine telefon shalyńyz. Qaı dárihanada zańbuzýshylyqqa jol berilgendigin kórsetińiz, osy nómirge beıne, aýdıojazbany jibere alasyzdar», - deıdi jobalyq keńseniń jetekshisi.
Amangeldi Satanov turǵyndardy belsendilik tanytýǵa shaqyrdy.
«Emdeý oryndarynda medıtsınalyq qyzmetti alýda zańsyzdyqqa jol berilip jatsa, máselen statsıonarlarǵa birinshi kezekte tanys-týystary jatqyzylyp jatsa da bizge naqty derekterdi joldańyzdar. Biz olardy tıisti mekemelerge jiberemiz. Qaıtalanýyna jol bermeımiz», - deıdi Amangeldi Satanov.
