SQO-da dárigerler salmaǵy nebary 1,6 kg shaqalaqqa ota jasap, aman alyp qaldy
PETROPAVL. KAZINFORM – Petropavlda dárigerler merziminen erte týǵan jáne damýynda aýyr týa bitken aqaýy bar shaqalaqqa eki ota jasady.
Soltústik Qazaqstan oblystyq densaýlyq saqtaý basqarmasynyń málimetinshe, náresteniń anasy júktiligi boıynsha medıtsınalyq tirkeýge turmaǵan. Sondaı-aq áıel aýrýhanaǵa jetpeı jolda bosanyp qalǵan. Saldarynan bala shala týyp, salmaǵy nebári 1600 gramm ǵana boldy. Óte aýyr halde ol aldymen Oblystyq perınataldyq ortalyqqa jetkizilip, jaǵdaıy birshama turaqtanǵan soń, jedel túrde Kópbeıindi oblystyq balalar aýrýhanasyna aýystyryldy.
Tekserý barysynda dárigerler baladan aýyr týa bitken damý aqaýyn - ashi ishektiń atrezııasyn anyqtady. Bul - ishektiń tolyq damymaı, bitelýi, hırýrgııalyq aralasýsyz sábıdiń ómir súrýi múmkin emes.
- Petropavldaǵy kópbeıindi oblystyq balalar aýrýhanasynyń tájirıbesinde adam sengisiz, naǵyz medıtsınalyq ǵajaıypqa teń keler oqıǵa tirkeldi. Hırýrgtar men reanımatologtardyń joǵary sheberligi men tóziminiń arqasynda náreste ómiri saqtaldy.
Jaǵdaıdy balanyń salmaǵynyń azdyǵy jáne aǵzasynyń jetilmegendigi odan ári qıyndata tústi. Sábıdiń ómiri úshin kópsalaly medıtsınalyq komanda kúresti, - deıdi basqarma ókilderi.
Nátıjesinde sábıge kolostomııa - balanyń aýyr jaǵdaıyna baılanysty ishekti ýaqytsha bosatý úshin jasalǵan májbúrli shara qoldanyldy. Sondaı-aq asqazan-ishek jolynyń tutastyǵyn qalpyna keltirýge baǵyttalǵan ota jasaldy. Dárigerler bul operatsııany medıtsınadaǵy «zergerlik» dep baǵalap otyr.
- Salmaǵy nebári 1,6 keli bolatyn nárestege ota jasaý – asa dáldikti talap etetin jumys. Munda árbir mıllımetr mańyzdy. Alaıda operatsııadan keıingi kezeń de kem túsken joq. Aýrýhananyń reanımatologtary sábı aǵzasynyń ómirlik mańyzdy qyzmetterin turaqtandyrý, tynysyn durystaý, qorektendirý jáne ınfektsııalardan qorǵaý baǵytynda orasan eńbek sińirdi, - deıdi mamandar.
Júktilik kezinde baqylaýdyń bolmaýyna jáne sábıdiń asa tómen salmaǵyna qaramastan, Petropavldaǵy Kópbeıindi oblystyq balalar aýrýhanasynyń hırýrgtary, anestezıolog-reanımatologtary men neonatologtarynyń birlesken eńbeginiń arqasynda bala aman qaldy.
Buǵan deıin Shymkentte dárigerler 4 jasar balanyń ishindegi úlken isikti kúrdeli ota jasap, alyp tastaǵanyn jazǵan edik.