SQO-da dárigerler omyrtqaǵa zamanaýı ádispen kúrdeli ota jasady
PETROPAVL. KAZINFORM — Soltústik Qazaqstan oblysynda neırohırýrgtar alǵash ret jańa ádispen gryjany emdeı bastady.
Áleýmettik medıtsınalyq saqtandyrý qory oblystyq fılıalynyń málimetinshe, kúrdeli ota naýqasqa MÁMS aıasynda tegin jasaldy. Kópbeıindi oblystyq aýrýhanada neırohırýrgter omyrtqadaǵy jaryqty emdeý úshin alǵash ret OLIF ádisi boıynsha aldyńǵy jaqtan spondılodez jasady. Spondılodez — omyrtqa hırýrgııasynda qoldanylatyn ota, aýyratyn bóligin qozǵalmaıtyndaı etip biriktiredi.
48 jastaǵy naýqas buryn omyrtqadaǵy aýyrsynýdy basý úshin dárimen emdelip kelgen. Jaǵdaıy nasharlaǵandyqtan, mamandar ota jasaýǵa sheshim qabyldady. Tekserilýden keıin aldyńǵy julyn sıntezin júrgizetin boldy. Bul operatsııa SQO-da buryn eshqashan jasalǵan emes.
— Neırohırýrgtar omyrtqaǵa qıǵash, búıirden sál alǵa qaraı ish arqyly ota jasady. Mundaı operatsııa osy kúnge deıin tek Almaty, Astana, Qaraǵandy jáne Oral qalalarynda júrgizildi. Bizdiń qala omyrtqalardy plastıkalyq materıalǵa almastyrý otasyn jasaǵan besinshi qala boldy. Aldaǵy ýaqytta osyndaı operatsııalardy turaqty negizde júrgizýdi josparlap otyrmyz, — deıdi neırohırýrg Balhar Shatýev.
Buryn SQO-da omyrtqadaǵy jaryqqa ota anýs arqyly jasalyp kelgen.
— Qazir esh jerim aýyrmaıdy. Qalpyma kelip jatyrmyn. Ota saqtandyrý aıasynda tegin jasaldy. Ońaltýdan keıin birden jumysqa shyǵamyn. Dárigerlerge rahmet, — dedi naýqas Elena Kolosova.
Buǵan deıin BQO-da kardıologııalyq ortalyqqa jyl saıyn 4 myńnan astam adam túsetinin jazǵan edik.
