SQO-da dala órtiniń aldyn alý jumystary bastalyp ketti
PETROPAVL. QazAqparat - Soltústik Qazaqstan oblysynda dala jáne orman alqaptary órtiniń aldyn alý jumystary bastalyp ketti, dep habarlaıdy QazAqparat tilshisi.
Tabıǵı baılyqty órtten saqtaý úshin Tótenshe jaǵdaılar departamenti mamandary qyzý jumys ústinde. Kún jylynysymen dala men orman-toǵaıda órt oqıǵalary jıileıdi. Máselen byltyr jaz mezgilinde dala órtiniń 14 deregi tirkelgen. Sonyń saldarynan orman men jazyq dalanyń 34 gektary otqa orandy.
«Qaýipti kezeńde órt qaýipsizdigi erejeleriniń saqtalýyn baqylaý úshin TJD, jergilikti polıtsııa qyzmeti, SQO tabıǵı resýrstar jáne tabıǵat paıdalanýdy retteý basqarmasynyń qyzmetkerleri arasynan oblystyq jáne aýdandyq mobıldik toptar quryldy. Olar órtengen qýraǵan shóptiń baqylaýda bolýyn jáne órt qaýipsizdigi talaptarynyń saqtalýyn qadaǵalaıdy. Tártip buzǵandar ákimshilik jaýapqa tartylady»,- dep atap ótti SQO Tótenshe jaǵdaılar departamenti bastyǵynyń orynbasary Nurlan Atyǵaev.
Qazirgi tańda óńirdiń orman sharýashylyqtarynyń 81 paıyzy órtpen kúres quraldarmen jabdyqtalǵan.
Mamandardyń aıtýynsha, órt kóbine jurttyń beıǵamdyǵynan jáne qarapaıym saqtyq sharalaryn saqtamaǵannan shyǵady. Mysaly qurǵaq shópti jaǵý kezinde arnaıy qorǵanys jolaqtary salynbaıdy eken.
«Bıyl ázirge dala órti tirkelgen joq. Tótenshe jaǵdaı mamandary oblys boıynsha aldyn-alý sharalaryn uıymdastyrýda, aýyl sharýashylyq qurylym basshylarymen kezdesip jadynamalar taratýdamyz. Sonymen qatar, halyqpen kezdesip túsindirme jumystary júrgizilýde. Qazirgi kezde 4 top qurylyp, tabıǵat resýrstary basqarmasy mamandarymen birge oblysty aralap, órt qaýipsizdigi erejelerin saqtaý boıynsha tekseris júrgizilýde», - dedi Nurlan Atyǵaev.
SQO Tótenshe jaǵdaılar departamenti mamandarynyń aıtýynsha, oblystyq ákimdikke 434 myń gektar ormandy dala jáne 100 myń gektar «Kókshetaý» tabıǵı ulttyq parki qaraıdy eken.
