SQO-da COVID juqtyryp, em alyp jatqandardyń ekeýi – júkti áıel
PETROPAVL. KAZINFORM – Soltústik Qazaqstan oblysynda COVID-pen aýyrǵandardyń sany artyp keledi. Jyl basynan beri koronavırýs juqtyrýdyń 54 jaǵdaıy tirkeldi. Qaıtys bolǵandar joq.
Óńirlik kommýnıkatsııalar qyzmeti uıymdastyrǵan brıfıngte SQO-daǵy epıdemıologııalyq jaǵdaı týraly aıtyldy.
SQO Densaýlyq saqtaý basqarmasynyń basshysy Qanysh Bıjanovtyń aıtýynsha, óńirde vırýstyq ınfektsııalardan emdeý úshin jatqyzýǵa barlyǵy 181 oryn daıyndaldy, onyń 113-i - balalarǵa, 68-i - eresekterge arnalǵan.
«Búgingi kúni emdeý mekemelerinde koronavırýs juqtyrǵan 4 adam statsıonarlyq em alyp jatyr, olardyń ekeýi júkti áıel. Sondaı-aq jiti respıratorlyq-vırýstyq ınfektsııa juqtyrǵan 18 adam aýrýhanaǵa tústi, olardyń jeteýi eresek, 11-i – bala.
Ótken táýlikte JRVI-men 4 patsıent, ıaǵnı bir bala, bir júkti áıel jáne eki eresek emdelýge jatqyzyldy, koronavırýstan táýir bolǵan bir syrqat aýrýhanadan shyǵaryldy», - deıdi Qanysh Bıjanov.
Basqarma basshysynyń aıtýynsha, búginde ambýlatorlyq jaǵdaıda sýyq tıip aýyrýdyń 689 deregi tirkeldi. Onyń ishinde 427-si - 18 jasqa deıingi bala, 28-i – eresekter.
SQO sanıtarııalyq-epıdemıologııalyq baqylaý departamentiniń basshysy Áset Jumataevtyń aıtýynsha, jyl basynan beri koronavırýstyq ınfektsııanyń 54 jaǵdaıy tirkeldi. Qaıtys bolǵandar joq.
«KVI kóp jaǵdaıda jeńil ótip jatyr. Qazaqstanda, búkil álemdegideı, 100% Omıkron shtammynyń ártúrli nusqalary taralyp jatyr. JRVI, tumaý jáne COVID-19 boıynsha epıdemııalyq maýsym kezeńinde profılaktıkalyq jáne epıdemııaǵa qarsy is-sharalardy ótkizý boıynsha Bas memlekettik sanıtarııalyq dárigerdiń qaýlysy bar. Onyń ishinde betperde paıdalaný, antıseptıkterdi qoldaný, JRVI, tumaý belgileri bar júkti áıelder men bir jasqa deıingi balalarǵa qatysty úıge shaqyrý kelip túsken jaǵdaıda olarǵa birinshi kezekte qyzmet kórsetý jáne 15 qyrkúıekten bastap tumaýǵa qarsy vaktsınatsııa júrgizý sharalary bar», - deıdi Áset Jumataev.
Bıyl táýekel tobyna jatatyn 60 myń adamdy tegin ımmýndaý josparlanǵan. Ol úshin Reseıde shyǵarylǵan «Grıppol plıýs» vaktsınasy satyp alyndy. Vaktsınatsııa turǵylyqty jeri boıynsha emhanalarda júrgiziledi.
Buǵan deıin SQO-da AITV juqtyrǵan 10 balany dárigerler baqylaýyna alǵanyn jazǵan edik.
