SQO-da bıýdjettik 30 kópqabatty úı salynyp jatyr

PETROPAVL. QazAqparat – Soltústik Qazaqstan oblysynda sońǵy tórt jylda turǵyn úı qurylysyn bıýdjettik qarjylandyrý 3 ese artyp, bıyl bul salaǵa 29 mlrd teńge jumsaldy, dep habarlaıdy QazAqparat tilshisi.

SQO ákimdiginde jyldy qorytyndylaǵan, bolashaqqa jospardy aıqyndaǵan jıyn ótti.

«Bıyl soltústikqazaqstandyqtar qaı salada bolmasyn aıanbaı eńbek etti. Men jumysshylarǵa, sharýalarǵa, kásipkerlerge, dárigerler men muǵalimderge, adal eńbek etip, bolashaq jetistikterdiń negizin qalaǵan barshaǵa shyn júrekten alǵys aıtamyn.

Aldaǵy maqsat aıqyn. Biz úshin eń bastysy alǵan qarqyndy tómendetpeý, jerlesterimizdiń turmysyn jaqsartýǵa bar kúsh-jigerimizdi salý», - dedi jıyndy ashqan óńir basshysy Qumar Aqsaqalov.

Qaı salada bolmasyn bıylǵy kórsetkish jaqsy. Máselen turǵyn úı qurylysyna keler bolsaq, sońǵy 4 jylda bıýdjettik qarjylandyrý 9 mlrd-tan 29 mlrd teńgege deıin artyp, úsh ese ósken.

Kommertsııalyq qurylys qarqyn alyp keledi. 2017 jyly ınvestor qarajatyna 1 ǵana kóp qabatty úı turǵyzylsa, bıyl osyndaı 23 baspana salynyp jatyr. Sheteldikter tarapynan da qyzyǵýshylyq baıqalady.

«Túrik kompanııasy oblys ortalyǵynda kóp qabatty úılerdi salýǵa múddeli. Jobalaryn usyndy. Erekshe salynǵan kommertsııalyq úıler bizdiń qalaǵa kórik beredi dep oılaımyn.

Budan basqa bıýdjettik kópqabatty 30 baspana salynyp jatyr. Sońǵy 4 jylda oblys ortalyǵynda 1 mln sharshy metr turǵyn úı paıdalanýǵa berilgen, 30 myńǵa jýyq adam turmystyq jaǵdaıyn jaqsartty», - deıdi oblys ákimi.

Qazir Petropavlda «Jańa qala» renovatsııalyq baǵdarlamasy júrgizilip jatyr. SQO Nur-Sultan men Almaty qalalarynan keıin óńirlerdiń ishinde birinshi bolyp bul baǵdarlamany qolǵa aldy. Nátıjesinde 6 myńǵa jýyq qala turǵyny jańa baspanaǵa qonys aýdardy.

«Renovatsııa baǵdarlamasy Petropavldaǵy Kopaı shaǵyn aýdanynda da júzege asady. Qazirgi ýaqytta 2,8 myń páteri bar 17 kóp qabatty úıdiń jobasy ázirlendi. Eski úıler súrilip, ornyna jańa baspanalar turǵyzylady», - deıdi Qumar Aqsaqalov.