SQO-da bıýdjet qarjysyn jymqyrǵan, para berip, alǵan 4 adamǵa sot úkimi shyqty

PETROPAVL. KAZINFORM – Soltústik Qazaqstan oblysynda aýdandyq bilim bóliminiń qyzmetkerleri, ishki memlekettik aýdıt departamentiniń bólim basshysy jáne jeke kásipker sottaldy.

SQO soty baspasóz qyzmetiniń málimetinshe, olarǵa bıýdjet qarjysyn urlady, para berdi jáne aldy degen aıyp taǵylǵan.

2022 jyldyń qarasha aıynda M.Jumabaev aýdany bilim bóliminiń basshysy R. jeke kásipker T.-men birge bıýdjet qarajatyn jymqyryp, memleketke 7 mln teńge shyǵyn keltirgen. Bul qarajat osy aýdandaǵy 7 mekteptiń avtomattandyrylǵan órt dabylqaqqyshtaryna aǵymdaǵy jóndeý júrgizý úshin bólingen.

Sondaı-aq R. ózi basqaratyn bólimniń bas býhgalteri K.-men 1 mln astam teńgeni urlap, ishki memlekettik aýdıt departamentiniń aýdıt jáne qarjylyq esep bóliminiń basshysy O.-ǵa 650 myń teńge para bergen.

Sottalýshylar R., K., T. óz kinálaryn ishinara, al O. tolyq moıyndady.

Petropavl qalalyq soty T.-nyń úsh kishkentaı balasynyń barlyǵyn, O.-nyń kinásin tolyq moıyndaýyn, K.-nyń aýyratyndyǵyn, R.-nyń dertinen bólek, memleketke para somasy mólsherinde qaıtarýyn jeńildetetin jaǵdaı dep esepke aldy.

Al R.-nyń antyn buzýy onyń jazasyn aýyrlatty.

Sot úkim shyǵararda memleketke keltirilgen materıaldyq shyǵynnyń tolyq ótelýin de eskerdi.

Nátıjesinde Sot aýdandyq bilim bóliminiń eks-basshysyna 88 mln 627 myń teńge, jeke kásipkerge 76 mln 127 myń teńge, bas býhgalterge 21 mln 645 myń teńge, ishki memlekettik aýdıt departamentiniń bólim basshysyna 26 mln teńge aıyppul túrindegi jaza kesti.

Sottalýshylar ómir boıyna memlekettik qyzmette jumys isteý quqyǵynan aıyryldy.

Olar aıyppuldy sot úkimi zańdy kúshine engennen keıin bir aı ishinde tóleýi tıis. Oryndamaǵan jaǵdaıda bas bostandyǵynan aıyrý jazasyna aýystyrylady.

Sot úkimi ázirge zańdy kúshine engen joq.