SQO-da bıýdjet qarajatyn jymqyrǵan býhgalterler sottaldy
PETROPAVL. KAZINFORM — Soltústik Qazaqstan oblysynyń Esil aýdanynda bıýdjet qarajatyn jymqyrǵan aýyldyq okrýg ákimdikteriniń býhgalterlerine qatysty sot úkimi shyqty.
SQO prokýratýrasynyń málimetinshe, bıýdjet qarjysyn urlaý faktileri zańdylyqty qamtamasyz etý jáne bıýdjettik qarajattyń jumsalýyn taldaý barysynda anyqtalǵan.
Tergeý barysynda býhgalterlerdiń qarajatty zańsyz aýdarý, býhgalterlik qujattarǵa jalǵan málimetter engizý jáne qyzmettik ókilettikterin teris paıdalaný arqyly memleket qarjysyn ıemdengeni belgili boldy.
Sotqa deıingi tergep-tekserý aıaqtalǵannan keıin qylmystyq ister sotqa joldanyp, sottalýshylardyń kinási tolyq dáleldendi.
Sot úkimimen býhgalterler kináli dep tanylyp, olarǵa probatsııalyq baqylaý belgilene otyryp, shartty túrde bas bostandyǵynan aıyrý jazasy taǵaıyndaldy.
Sonymen qatar, olarǵa tórt jáne bes jyl merzimge býhgalterlik qyzmetke jáne materıaldyq jaýapkershilikke baılanysty laýazymdardy atqarýǵa tyıym salyndy.
Prokýratýra memlekettik qyzmetshiler bıýdjet qarajatynyń ashyq ári maqsatty jumsalýyn qamtamasyz etýge mindetti ekenin eske salyp, memlekettik qarjyǵa qatysty kez kelgen zańsyz áreket zańda kózdelgen jaýapkershilikke ákep soǵatynyn eskertedi.
Buǵan deıin BQO-da býhgalter 106 mln teńge bıýdjet qarjysyn qumar oıynǵa jumsaǵanyn jazǵan edik.
