SQO-da byltyr jemqorlyq týraly habarlaǵan 7 adam syıaqy aldy

PETROPAVL. QazAqparat – Soltústik Qazaqstan oblysynda Sybaılas jemqorlyqqa qarsy qyzmet turǵyndardy jemqorlyqpen kúreste belsendilik tanytýǵa shaqyrdy, dep habarlaıdy QazAqparat tilshisi.

QR Sybaılas jemqorlyqqa qarsy is-qımyl agenttiginiń SQO boıynsha departamentiniń málimetinshe, byltyr óńirde sybaılas jemqorlyq faktileri týraly habarlaǵan 7 adamǵa jalpy somasy 1 370 900 teńge syıaqy berilgen.

Mamandardyń aıtýynsha, sybaılas jemqorlyqpen kúreste qylmystyq áreket faktileri týraly habarlaǵan adamdardy aqshalaı kótermeleý jumystyń pármendi tetikteriniń biri bolyp otyr.

Qazaqstanda azamattardy kótermeleýdiń saralanǵan júıesi engizilgen. Oǵan sáıkes sybaılas jemqorlyq týraly habarlaǵan adam para nemese keltirilgen zalal somasy, ne usynylǵan jeńildikter nemese kórsetilgen qyzmetter somasyna baılanysty aıyptaý úkimi shyǵarylǵannan keıin para somasynyń 10 %-yn ala alady. Biraq joǵarǵy syıaqy 4 myń AEK-ten, ıaǵnı 12 252 000 teńgeden aspaýy tıis.

Óńir turǵyndary sybaılas jemqorlyq faktileri týraly Sybaılas jemqorlyqqa qarsy qyzmettiń 1424 CALL-ortalyǵyna tegin qońyraý shalý arqyly nemese aýmaqtyq departamentke habarlasa alady. Memleket sybaılas jemqorlyq faktileri týraly habarlaǵan adamdardy qorǵaýǵa alady.