SQO-da byltyr zańsyz aınalymnan 2 kg sıntetıkalyq esirtki alyndy
Sıntetıkalyq esirtki «qara naryqty» jaýlap, dástúrli esirtkilerdi yǵystyryp jatyr. SQO esirtki qylmysyna qarsy is-qımyl basqarmasynyń bastyǵy Jandos Basybaevtyń aıtýynsha, 2017 jyly esirtki saýdasyna qatysty 332 qylmys tirkelse, sonyń 6-ýy ǵana nemese 1,8 %-y sıntetıkalyq esirtkige qatysty boldy. 2018 jyly tirkelgen 221 derektiń 34-i «sıntetıkaǵa» qatysty bolyp, onyń úlesi 15,4 %-ǵa jetti. Al 2019 jyly esirtki aınalymyna qatysty tirkelgen 176 derektiń 46-sy nemese 26,1 %-y psıhotropty zattarmen baılanysty boldy.
«2020 jyly esirtki aınalymyna baılanysty 195 derek tirkeldi. Onyń 74-i sıntetıkalyq esirtkige qatysty. Bul – esirtki qylmysynyń 38%-i. Zańsyz aınalymnan 2 kelige jýyq «sıntetıka» alyndy. Shamamen 20 myń doza. Onyń naqty baǵasy eshqaıda resmı túre kórsetilmeıdi. Biraq bir ózimiz úshin ishki taldaý jasaımyz. ıAǵnı 2 keli sıntetıkalyq esirtkiniń «qara naryqtaǵy» quny 20 mln teńge», - deıdi Jandos Basybaev.
2019 jyly esirtki naryǵynda paıda bolǵan ár sıntetıkalyq esirtki úshin jaýapqa tarta bastady. Búginde esirtki men psıhotropty zattardy jasaǵany, paıdalanǵany jáne saqtap taratqany úshin 15 jylǵa deıin jaza qarastyrylǵan. Biraq bul da toqtaý salmaı otyr. Byltyr esirtkini ótkizýge qatysty 49 derek tirkelse, sonyń 70 %-y sıntetıkalyq esirtkimen baılanysty.
«QR Qylmystyq Kodeksine esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizýge qatysy bar adamdardy qylmystyq jaýapqa tartý týraly ózgertýler engizilgeli bizdiń basqarma sıntetıkalyq esirtkini taratyp kelgen 6 ınternet-dúkendi anyqtap, japty. Qazir bul iste tájirıbemiz bar.
Qylmystyq jaýapkershilikke bul saıttardyń ákimgerleri ǵana emes, osy dúkendi uıymdastyrǵandar, qarjy bólgender, kýrerler, jarnama taratýshylar da tartyldy. Olar birneshe jylǵa bas bostandyǵynan aıyryldy», - deıdi SQO esirtki qylmysyna qarsy is-qımyl basqarmasynyń basshysy.
Esirtkige, sıntetıkalyq preparattardyń zańsyz aınalymyna qarsy kúres jumystary SQO-da júıeli túrde júrgizilip jatyr.
«Karantınge baılanysty jasóspirimder, jastarmen onlaın formatta túrli is-sharalar ótkizilip jatyr. Sońǵy eki jylda ata-analarmen jumysty kúsheıttik. Óıtkeni qazir balalar negizinen úıde otyr. Al ata-ana olar úshin tolyq jaýap beredi.
Jastardyń volonterlik uıymdaryn esirtkimen kúreske tarttyq. Byltyr olardyń kómegimen 379 esirtki jarnamasy boıaldy.
Petropavldaǵy páter ıeleri kooperatıvi (PIK) tóraǵalarynyń ortaq chatyn qurdyq. Ol jerge qala turǵyndary esirtki jarnamasyn kórgen jaǵdaıda fotoǵa túsirip jibere alady», - deıdi Jandos Basybaev.
Polıtseıdiń aıtýynsha, sońǵy ýaqytta esirtki qylmysy jastardyń arasynda keń taralyp barady. Byltyr sıntetıkalyq esirtkiniń zańsyz aınalymyna qatysty 18-25 jas aralyǵyndaǵy 23 adam jaýapqa tartyldy.
Al SQO densaýlyq saqtaý basqarmasynyń esebinde byltyr 534 adam nashaqor retinde esepte tursa, solardyń ekeýi – jasóspirim, bireýi 15-te bolsa, ekinshisi 17-ge kelgen. Esirtkige táýeldi 133 adamnyń jastary 18-ben 30 aralyǵynda.
