SQO-da byltyr óndiriste jaraqat alǵandarǵa 19 mln-nan astam teńge tólendi
PETROPAVL. QazAqparat - Soltústik Qazaqstan oblysynda byltyr óndiriste jaraqat alǵandarǵa 19,2 mln teńgege tólem jasalsa, onyń 12 mln teńgesi eńbekke jaramsyzdyq paraǵy boıynsha berilgen, dep habarlaıdy QazAqparat tilshisi.
SQO Statıstıka departamenti baspasóz qyzmetiniń habarlaýynsha, 2018 jyly óńirdegi kásiporyndar men uıymdarda 74 adam jaraqattan zardap shegip, eńbek qabilettiliginen ýaqytsha aıyrylsa, sonyń 21-i áıel. Jumys ýaqytynda zaqym alǵandardyń 62,2% jekemenshik kásiporyndar men uıymdarda, 32,4% - memlekettik jáne 5,4% - ózge memleketterdiń menshigindegi kásiporyndarda eńbek etken.
Mamandardyń resmı málimetinshe, byltyr óndiriste 3 adam qaza tapqan. Bul 2017 jylmen salystyrǵanda 62,5% az. Qaza tapqandardyń ekeýi jekemenshik, al bireýi ózge memleketterdiń menshigindegi kásiporyndarda eńbek etken.
Qaıǵyly oqıǵa kóbine aýyl, orman jáne balyq sharýashylyǵynda tirkelgen. Zardap shekkenderdiń 25,7%, ıaǵnı 19 adam osy sala qyzmetkerleri. Sondaı-aq densaýlyq saqtaý salasynyń 9 qyzmetkeri, óńdeý ónerkásibinde jumys isteıtin 7 adam, saýda jáne kólik salasynyń 6 mamany, sýmen jabdyqtaý jáne memlekettik basqarý salasynyń 5 qyzmetkeri óndiristik zaqym alǵan.
Jazataıym oqıǵalar negizinen japa shekkenderdiń abaısyzdyǵynan bolady eken. Osy sebeppen 28 adam ýaqytsha eńbek qabilettiliginen aıyrylǵan. Byltyr 13 adam bıikten qulap ketse, 8 adam uıymnyń kóliginde kele jatyp jol apatyna ushyraǵan. Jalpy, óndiriste jaraqat alýshylardyń árbir tórtinshisi derlik - óndiristik jabdyq operatory, qurastyrýshy nemese júrgizýshi bolyp eńbek etedi.
Zardap shekkenderdiń jalpy sanynan 44,6% 46-60 jastaǵylar bolyp tirkelgen.
Statıstıka qyzmetiniń málimetterinshe, 2018 jyly óndiristegi jazataıym oqıǵalar boıynsha 19,2 mln teńge materıaldyq tólem jasalsa, onyń 12 mln teńgesi eńbekke jaramsyzdyq paraǵy boıynsha tólengen. Budan basqa shamamen 7 mln teńgeni birjolǵy járdemaqylar qurady.
