SQO-da byltyr óndiriste jaraqat alǵan 44 adamnyń altaýy qaza tapty

PETROPAVL. QazAqparat – Soltústik Qazaqstan oblysynda óndiriste byltyr 38 jazataıym oqıǵa bolsa, 44 adam zardap shekken, altaýy qaıtys boldy. Memlekettik eńbek ınspektorlarynyń aıtýynsha, onyń basym bóligi shaǵyn bıznes nysandarynda tirkelgen, dep habarlaıdy QazAqparat tilshisi.

SQO-nyń qoǵamdyq keńesinde memlekettiń eńbek ınspektsııasy basqarmasy ótken jyldy qorytyndylady.

Vedomstvo jetekshisi Marat Omarovtyń aıtýynsha, óndiriste 38 jazataıym oqıǵa boldy, 44 adam jaraqattandy, sonyń altaýy qaza tapty.

Byltyr 45 adam jaraqattanyp, 8-i qaıtys bolǵan.

«Barlyq jazataıym oqıǵalar QR qoldanystaǵy eńbek zańnamasyna sáıkes tekserildi. Tergeý qorytyndysy boıynsha 33 arnaıy tergeý materıaly polıtsııa organdaryna jiberildi. Óndiristegi jazataıym oqıǵalar negizinen shaǵyn bıznes jáne aýyl sharýashylyǵy uıymdarynda, sondaı-aq bıýdjettik salada tirkelgen. Sonyń ishinde shaǵyn bıznes uıymdaryndaǵy jazataıym oqıǵalardyń úlesi shamamen 24%, aýyl sharýashylyǵynda - 21% jáne bıýdjet salasy – 18%. Al ornalasýy boıynsha Petropavlda 21 oqıǵa bolǵan», - deıdi Marat Omarov.

Mamandar óndiristegi jazataıym oqıǵalarǵa taldaý júrgizip, saralady.

«13 jazataıym oqıǵa - 34%, zardap shekkenderdiń óreskel abaısyzdyq tanytýynan bolǵan. 9 jaǵdaıda jumys óndirisi qanaǵattanarlyqsyz uıymdastyrylǵan, 6 jaǵdaıda qaýipsiz eńbek tásilderin oqytý júrgizilmegen. Al 3 jaǵdaıda qaýipsizdik talaptary saqtalmaǵan», - deıdi basqarma basshysy.