SQO-da byltyr ókpe obyrynan 93 adam qaıtys bolsa, 210 adam esepke alyndy
SQO onkologııalyq ortalyqtyń onkologııa blogynyń jetekshisi Jiger Dúısenovtiń aıtýynsha, ókpe obyryn erte kezeńde anyqtaýdyń nátıjesinde bul qaýipti dertten jazylyp shyǵýǵa bolady. Sondyqtan ásirese temeki shegýshiler, kásiporyndarda ókpe obyryn týdyratyn kantserogendermen jumys isteıtinder, ókpeniń sozylmaly aýrýlary bar adamdar, 50 jastan asqan er adamdar densaýlyqtaryna asa mán berip, tekserýlerden ótip turýy tıis.
«Táýekel tobyna kiretinderge berer keńesim: jylyna bir-eki ret ókpeni rentgen arqyly teksertý qajet, jótelgendegi qaqyryqqa mán berip, onda qan bolǵan jaǵdaıda dereý dárigerge kóriný kerek. Sondaı-aq, jótel kúsheıip, dári kómektespegen jaǵdaıda, tynys alý aýyrlap nemese keýdede aýyrsyný, temperatýranyń túsiniksiz joǵarylaýy paıda bolǵanda birden tekserýden ótken jón. Bul – ókpeniń qaterli isigin der kezinde anyqtaýǵa múmkindik beredi. Neǵurlym dertpen kúresti erte bastasaq, soǵurlym nátıje beredi. Al ol úshin bizge syrqattyń kómegi asa qajet. Óıtkeni obyr bastapqyda syr bermeıdi», - deıdi Jiger Dúısenov.
Ókpeniń qaterli isigin emdeýdiń basqa onkologııalyq aýrýlardaǵy sııaqty birneshe joly bar, negizgileri - hırýrgııalyq, sáýlelik jáne dári-dármekpen emdeý.
«Ókpeniń qaterli isiginde hırýrgııalyq jol, atap aıtqanda metastazdar bolmaǵan kezde isikti tolyǵymen alyp tastaý eń tıimdi bolyp sanalady. Qazirgi ýaqytta 70 jastan asqan naýqastarǵa da bul otalar jasala beredi. Sáýlelik jáne hımıoterapııanyń ókpe qaterli isigin emdeýde de mańyzy zor. Olardy hırýrgııalyq ádispen birge qoldaný emdeý nátıjelerin edáýir jaqsartady. Ókpe obyrynyń dárige jáne radıatsııaǵa asa sezimtal túrleri bar. Alaıda, aýrýdy asqyndyrmaı erte kóringenderdiń jazylyp shyǵý kórsetkishi joǵary», - deıdi dáriger.
SQO-da 2020 jyly 173 adamda ókpeniń qaterli isigi anyqtalsa, byltyr 210 syrqat dárigerlerdiń baqylaýyna alynǵan. Eki jylda 184 adam qaıtys bolǵan, teń jartysy ótken jyldyń úlesinde. Qazir onkologııalyq ortalyqta 383 adam esepte tur. Olardyń 123-i úshinshi satyda bolsa, taǵy 24 naýqastyń jaǵdaıy nashar.