SQO-da byltyr qan aınalym júıesiniń aýrýlarynan 900-den astam syrqat qaıtys boldy
SQO densaýlyq saqtaý basqarmasynyń basshysy Qumar Kúsemisovtyń aıtýynsha, byltyr skrınıngtik tekserý kezinde qan aınalym júıesiniń aýrýlary bar 2092 adam anyqtalǵan. Olardyń barlyǵy dıspanserlik esepke alyndy. Bul óńirdegi osyndaı derti syrqattardyń 4,4%.
«Atqarylyp jatqan jumys nátıjesin berip jatyr. Byltyr onyń aldyndaǵy jylmen salystyrǵanda qan aınalym júıesiniń aýrýlary boıynsha ólim-jitim 14,4% azaıdy. 2021 jyldyń 11 aıynda 1069 adam qaıtys bolsa, byltyr sáıkes kezeńde 908 syrqat kóz jumdy.
Sonyń ishinde 30,5% - bas mıy tamyrlarynyń zaqymdanýynan, 31,8% - júrektiń ıshemııalyq aýrýynan, 37,1% - asqynǵan mıokard ınfarkty, arterıaldyq gıpertenzııa sııaqty basqa aýrýlardan qaıtys boldy», - deıdi basqarma basshysy.
Oblystyq kardıologııalyq ortalyqta 24/7 rejımimen angıografııalyq zerthana jumys isteıdi.
Byltyr qan aınalym júıesiniń aýrýlary boıynsha 85 trombolızıs júrgizilgen.
Budan basqa 3 myńǵa jýyq koronarografııa, koronarlyq kúretamyrǵa 1064 stent qoıyldy, 82 ballondyq angıoplastıka jasaldy.
70 myń syrqatty dıspanserlik emdep, dári-dármekpen qamtýǵa 1 mlrd 87 mln teńge jumsalǵan.
«Bul salada da másele joq emes, oblysta kardıologtar jetispeıdi. Medıtsınalyq-sanıtarııalyq alǵashqy kómek nysandarynyń kardıostandarttarmen tıisti deńgeıde jabdyqtalmaýy kardıologııalyq ortalyqtyń dárigerleri men qondyrǵylaryna úlken salmaq salyp otyr.
Al kardıologııalyq ortalyqqa qazirgi ýaqytta angıografııalyq qondyrǵy, mobıldi tsıfrlyq rentgenografıkalyq júıe, jasandy qan aınaldyrý, kardıohırýrgııalyq ota jasaýǵa qajet narkoz jáne ókpeni jasandy demaldyrý apparattary qajet», - deıdi Qumar Kúsemisov.
