SQO-da byltyr bir tonnadan artyq alkogol zańsyz saýdadan alyndy
PETROPAVL. QazAqparat – Soltústik Qazaqstan oblysynda bir jylda 1200 lıtr spırttik ishimdik zańsyz saýdadan alyndy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Mamlıýt aýdanyndaǵy aýyl dúkenderiniń birinen polıtseıler 120 lıtr alkogol ónimderin tárkiledi. Saýda ornynyń spırttik ónimderdi satýǵa ruqsaty bolmaǵan, soǵan qaramastan «Pshenıchnaıa» araǵyn satyp kelgen. Dúken ıesine ákimshilik is qozǵalyp, materıal jınaldy.
Osy aýdannyń ortalyǵy – Mamlıýtka qalasynyń 59 jastaǵy turǵyny da endi aıyppul tóleıdi. Ol araqty úıinde satyp kelgen. Tártip saqshylary saýdagerden 8 bótelke tárkiledi.
«Zańsyz araq-sharap satatyndardy anyqtaý maqsatynda mereke kúnderi reıdter ótkizildi. Spırttik ishimdikterdi arnaıy lıtsenzııasyz saýdalaýǵa bolmaıtynyn eske salamyz. Sondaı-aq 21 jasqa tolmaǵandarǵa alkogoldi satýǵa jáne olardyń satyp alýyna ruqsat joq. Araq-sharap saǵat 21.00-den túski saǵat 12.00-ge deıin saýdalanbaıdy. Al spırttik ishimdikti tyǵylyp satatyndardan ónimdi alý densaýlyqqa qaýip týdyratynyn eskertemiz», - deıdi Mamlıýt aýdandyq polıtsııa bóliminiń bastyǵy Serik Áljanov.
SQO-da byltyr tártip saqshylary lıtsenzııasyz araq-sharap satýdyń 185 deregin anyqtady. Spırttik ishimdik satýdyń tártibin 144 satýshy men saýda ornynyń ıesi buzǵan. Taǵy 11 jaǵdaıda saýdagerler alkogol ónimderiniń baǵasyn tómendetken jáne spırtti quıyp satqan. Reıdterdiń barysynda 1200 lıtr alkogol zańsyz saýdadan alyndy.
