SQO-da byltyr aýyryp qaıtys bolǵandar sany 2 esege artty

PETROPAVL. QazAqparat – Soltústik Qazaqstan oblysynda byltyr 8469 adam qaıtys bolǵan, bul respýblıkalyq kórsetkishten shamamen eki ese kóp. Dárigerler ólim-jitimge ákelgen negizgi bes jaǵdaıǵa toqtaldy, dep habarlaıdy QazAqparat tilshisi.

SQO qoǵamdyq keńes otyrysynda densaýlyq saqtaý basqarmasy basshysynyń orynbasary Qumar Kúsemisov ólim-jitimge qatysty statıstıkalyq málimetterdi usyndy. Statıstıka departamentiniń derekterine súıengen mamannyń aıtýynsha, byltyr oblysta 8469 adam qaıtys boldy, kórsetkish 100 myń turǵynǵa shaqqanda 1587.0 qurady, respýblıkalyq kórsetkish – 953, al 2020 jylǵymen salystyrǵanda 13,4 %-ǵa artqan.

«Byltyr tynys alý organdarynyń aýrýlarynan 1841 adam qaıtys boldy, 2020 jylmen salystyrǵanda 350 adamǵa ósken. Ol KVI-men baılanysty. Taralýy boıynsha ekinshi orynda qan aınalymy júıesiniń aýrýlary tur, odan 1171 adam kóz jumdy. 2020 jylmen salystyrǵanda 65 adamǵa kóp. Ólim-jitim 11 aýdanda ósken. Al 606 adam as qorytý organdarynyń aýrýlarynan dúnıeden ótken, kórsetkish onyń aldyndaǵy jyldan 69-ǵa az. Tórtinshi orynda onkologııalyq aýrýlar keledi, odan 561 adam qaıtys boldy, bul 2020 jylmen shamalas. Jaraqattaný men ýlanýdan 520 turǵyn kóz jumǵan. Munda da tómendeý baıqalady», - deıdi Qumar Kúsemisov.

Budan basqa SQO-da 437 adam koronavırýs ınfektsııasynan qaıtys boldy.

«SQO qartaıý ındeksi boıynsha respýblıkada kóshbasshy orynǵa ıe, respýblıka boıynsha 26,1 bolsa, Soltústik Qazaqstanda - 62,1. Egde jastaǵy adamdardyń kópshiliginde ádette ártúrli sozylmaly aýrýlar bar, bul koronavırýs ınfektsııasymen aýyrǵan kezde ólim-jitimniń ósýine tikeleı áser etti. Qaıtys bolǵandardyń 78 %-dan astamy – egde jastan asqandar», - deıdi basqarma basshysynyń orynbasary.

Osyǵan deıin SQO-da JRVI-men aýyrǵandardyń shamamen 70 paıyzy balalar ekeni jazyldy.