SQO-da byltyr 9 myńǵa jýyq adamǵa 722 mln teńgeniń ataýly áleýmettik kómegi kórsetildi

PETROPAVL. QazAqparat – Soltústik Qazaqstan oblysynda byltyr 9 myńǵa jýyq adamǵa 722 mln teńgeniń ataýly áleýmettik kómegi kórsetilse, bıyl olardyń qatary shamamen myń adamǵa artty. Bul maqsatqa 787 mln teńge qarastyrylǵan, dep habarlaıdy QazAqparat tilshisi.

SQO jumyspen qamtýdy úılestirý jáne áleýmettik baǵdarlamalar basqarmasynyń basshysy Rınat Eljasovtyń aıtýynsha, byltyr kepildendirilgen áleýmettik paketpen 2300-den astam bala qamtyldy. Oǵan 125 mln teńge bólindi.

Sonymen qatar, muqtaj sanatyndaǵy 8 400 adamǵa 271 mln teńgege áleýmettik tólem júrgizildi.

«Qıyn ómirlik jaǵdaıǵa tap bolǵan, biraq eńbekke qabiletti adamdarǵa kómektesý úshin olarǵa jumys usynylady. Byltyr 605 adam jumyspen qamtyldy, onyń 444 turaqty jumysqa ornalastyryldy. 19 adam túrli kýrstar men oqytýdan ótti, az qamtylǵan 45 adam bıznes-ıdeıalaryn iske asyrý úshin grant aldy.

Jalpy qabyldanǵan sharalar kedeılik sheginen tómen turatyn azamattar sanynyń ósýine jol bermedi. 2021 jylmen salystyrǵanda kómek alýshylar sany 10 326 adamnan 8 914 adamǵa deıin nemese 14% tómendedi», - deıdi basqarma basshysy.

Bıyl 9 700 azamatqa ataýly áleýmettik kómek kórsetý josparlanǵan. Bul maqsatqa 787,3 mln teńge qarastyrylǵan.

«Kepildi áleýmettik paket alýshylardyń tilegin eskere otyryp, eńbek jáne halyqty áleýmettik qorǵaý mınıstrligi bul kómekti osy jyldan bastap monetızatsııalaý týraly sheshim qabyldady. Endi ataýly áleýmettik kómek alýshylar qatarynan 1 jastan 6 jasqa deıingi árbir balaǵa aı saıynǵy negizde 1,5 AEK - 5175 teńge mólsherinde qosymsha aqshalaı tólem jasalady.

Bul ata-analarǵa balalarynyń jeke qajettilikterine qaraı ónimderdi óz betinshe tańdaýǵa múmkindik beredi», - deıdi Rınat Eljasov.

Oblysta kómektiń bul túrin alatyn 1600-ge jýyq bala bar. Bıyl olarǵa 74 mln teńgeniń kómegi kórsetilmek.