SQO-da byltyr 7 myńǵa jýyq náreste dúnıege keldi

PETROPAVL. QazAqparat – Soltústik Qazaqstan oblysynda byltyr 6 886 sábı ómir esigin ashty, alaıda 7 577 adam qaıtys bolǵan, dep habarlaıdy QazAqparat tilshisi.

SQO statıstıka departamentiniń málimetinshe, byltyr óńirde 6 886 sábı dúnıege kelse, sonyń 41,5 %-y Petropavlda týǵan. Nárestelerdiń 3 604-i ul, 3 282-si qyz. Demografııalyq kórsetkish boıynsha Shal aqyn, Sh.Ýálıhanov jáne Aqjar aýdandary alda keledi. Eń tómen bala týý kórsetkishi M.Jumabaev aýdanynda.

2020 jyldyń qańtar-jeltoqsan aralyǵynda 7 577 adam qaıtys boldy. Onyń 19,8 %-ynda tynys alý músheleri aýrýynan, 14,6 %-ynda qan aınalymy júıesi, 8,9 % asqorytý músheleri aýrýlarynan jáne 7,6 %-ynda qaterli isikten kóz jumǵan. Jazataıym oqıǵalardan, jaraqattaný men ýlanýdan qaıtqandardyń úlesi – 7,5 %.

Jalpy byltyr 2 932 neke qıylǵan, bul – 2019 jylmen salystyrǵanda shamamen 15 %-ǵa tómen. 860 otbasy ajyrasqan.

Ótken jyly SQO-ǵa 6 061 adam kóship keldi. Bul, mamandardyń aıtýynsha, 2019 jylmen salystyrǵanda 23,4 %-ǵa tómen. Kóship ketkender sany da 24,7 %-ǵa tómen bolǵanymen, óńirden 10 446 adam qonys aýdarǵan. Sonyń ishinde el ishindegi mıgratsııa 2 627 adam. Al syrtqa, kóp jaǵdaıda TMD elderine kóshedi eken. Sonyń ishinde negizinen Reseıge ketip, osy kórshi elden qonys aýdarady.

Álemniń basqa elderine oblystyń 237 turǵyny kóship ketken. Turaqty turý úshin 80 adam kelgen. Emıgratsııa elderi negizinen – Polsha men Germanııa. Kóship ketkenderdiń 95,8 %-y osy memleketterge tıesili. Al kelgenderdiń 67,5 %-y Qytaı men Mońǵolııadan qonys aýdarǵan.

Basqa óńirlerden 5467 adam kelip, 8094 adam ketken. Kelip-ketýshilerdiń negizgi úlesin Aqmola oblysy men Nur-Sultan qalasy alady.

Osylaısha, SQO turǵyndarynyń sany búginde 543,7 myń adam.