SQO-da byltyr 543 adam kásiporyndardaǵy oqý ortalyqtarynda qaıta daıarlyqtan ótti

PETROPAVL. QazAqparat – Soltústik Qazaqstan oblysynda kásipkerler palatasy «Adamı kapıtaldy damytý» baǵyty boıynsha atqarylǵan jumystardy qorytyndylady, dep habarlaıdy QazAqparat tilshisi.

SQO kásipkerler palatasy baspasóz qyzmetiniń málimetinshe, palata, jergilikti atqarýshy bılik jáne kásiporyndar arasynda 6 jyldan beri dýaldy bilim berý boıynsha Jol kartasy júzege asyp keldi. Nátıjesinde stýdentter keıin ózderi eńbek etetin kásiporynda óndiristik tájirıbeden ótedi. Bul kásiporyndar da tıimdi, ózderine qajetti mamandardy daıarlap alady, al olardy oqytýǵa jumsalatyn shyǵyn jergilikti bıýdjetten óteledi.

«6 jyldyń ishinde dýaldy oqytý Jol kartasyna oblystan 260 kásiporyn men 22 kolledj qosyldy. Oqý oryndarynda 8 salaǵa qajet 27 mamandyq oqytylyp, 32-si boıynsha biliktiligi arttyrylady. 2778 stýdentti qamtyǵan 346 úsh jaqty kelisim jasaldy», - deıdi SQO kásipkerler palatasynyń dırektory Arman Orazǵulov.

Jalpy SQO-da orta arnaýly bilim beretin 25 oqý orny bar. Onyń tórteýi – jekemenshik. Olar: gýmanıtarlyq-tehnıkalyq kolledj, Soltústik Qazaqstan ýnıversıtetiniń kolledji, SQO kásibı daıyndaý jáne servıs kolledji, sondaı-aq byltyr «Radýga» JShS janynan ashylǵan ınnovatsııalyq kásibı damytý kolledji. Sońǵysy óz óndirisine qajet mamandardy jumys ornynda ázirlep, jumysshylarǵa degen qajettilikti joıý maqsatynda qurylǵan.

Qazir barlyq kolledjderde 10724 adam bilim alyp jatyr. Olardyń 8370-i memlekettik tapsyrys boıynsha oqıdy. Byltyr 4 myńǵa jýyq jas oqý oryndarynan túlep ushty.

Kásipkerler palatasy jyl saıyn kásipkerler arasynda saýalnama júrgizip, eńbek naryǵynda suranysqa ıe mamandyqtardy anyqtaıdy.

«2021 jylǵa qajet mamadyqtardy anyqtaý úshin 1703 jumys berýshi suraldy. Eńbek naryǵyna memlekettik jáne salalyq baǵdarlamalardy júzege asyrý úshin 3462 adam kerek eken. Memlekettik tapsyrysty berý úshin Bilim basqarmasynda 13 adamnan turatyn komıssııa qurylǵan. Olardyń 7-ýi bıznes ókilderi. ıAǵnı memlekettiń esebinen maman daıarlaýda kásipkerlerdiń, erteńgi jumys berýshilerdiń pikiri esepke alynady», - deıdi SQO kásipkerler palatasy adamı kapıtaldy damytý bóliminiń bastyǵy Vladımır Lıtvınenko.

Suranysqa asa ıe kadrlardy daıarlaýda kásiporyndar janynan qurylǵan oqý ortalyqtarynyń jumysy orasan. Búginde oblystaǵy 13 kompanııa osy múmkindikti paıdalanyp jatyr. Olardyń ishinde «Radýga» JShS, «Oqýshylar jáne balalar kıiminiń tigin fabrıkasy» JShS, «PZTM» AQ bar.

Byltyr osyndaı ortalyqtardy 525 adamdy oqytý josparlansa, is júzinde odan 543 maman ótti. Olardyń 401-i jumysqa ornalasty.