SQO-da byltyr 210 balaǵa semizdik dıagnozy qoıylǵan
PETROPAVL. QazAqparat – Soltústik Qazaqstan oblysynda byltyr 14 jasqa deıingi 210 balaǵa shamadan tys artyq salmaǵy úshin semizdik dıagnozy qoıyldy, dep habarlaıdy QazAqparat tilshisi.
SQO sanıtarııalyq-epıdemıologııalyq baqylaý departamentiniń málimetinshe, elimizde bastaýysh synyp oqýshylarynyń 5 %-y semizdikpen aýyrady jáne shamamen 10 %-y artyq dene salmaǵyna ıe. Semizdik aýrýy jasóspirimder arasynda da jıi kezdesedi.
Mamandardyń aıtýynsha, semizdikke ákeletin negizgi faktor – durys tamaqtanbaý. Ol osy zamanǵy dıetologııanyń mańyzdy problemasyna aınalyp otyr.
«Ǵylymı zertteýlerge súıensek, oqýshylardyń 80 %-y ońaı sińetin kómirsýlar, maılar men natrııdi shamadan tys tutynýdan aǵzaǵa qajetti dárýmenderdi, mıneraldardy az qabyldaıdy, saldarynan olar nashar oqıdy, baıaý oılaıdy, tez sharshaıdy. Dúnıejúzilik densaýlyq uıymy málimetteri boıynsha, aýrýdyń týýyna 50-70 %-ynda tamaqtaný sapasy, tamaqtaný tártibiniń buzylýy, durys tamaqtaný jáne ishý mádenıetiniń bolmaýy sebep», - deıdi SQO sanıtarııalyq-epıdemıologııalyq baqylaý departamenti bilim berý jáne tárbıeleý obektilerin baqylaý jáne qadaǵalaý bóliminiń basshysy Gúlnara Seıtova.
Dúken sórelerinde, dámhanalar men meıramhanalar mázirinde jıi kezdesetin qarapaıym taǵam – fastfýd balalar arasynda suranysqa ıe.
«Sendvıch, hot-dog, pıtstsa, quımaq jáne shaýrma, frı kartoby, býrgerlerdi daıyndaýda tómen sapaly shıkizat jıi qoldanylady. Fastfýdqa jatatyn barlyq taǵamdar maılarmen, qantpen qanyqqan jáne olarda aǵzaǵa qajetti dárýmender men mıneraldar joq deýge bolady. Mundaı ónimdermen jıi taǵamdaný ish qatýǵa, ishek mıkroflorasynyń buzylýyna áser etedi. Fastfýdty qoldaný semizdikke, ımmýnıtettiń tómendeýine jáne as qorytý joldarynyń problemalaryna ákeledi. Qant dıabeti damýynyń qaýpin arttyrady», - deıdi Gúlnara Seıtova.
SQO-da 2019 jyly 14 jasqa deıingi balalar arasynda semizdiktiń 270 jaǵdaıy tirkelse, byltyr 210 balaǵa osyndaı dıagnoz qoıylyp, esepke alynǵan.
